میدیای ئیسرائیل: ئەحمەد شەرع و نەتانیاهۆ کۆدەبنەوە

ئاڤا نیوز

میدیاکانی ئیسرائیل ئاشکرای دەکەن، دانوستانە ئەمنییەکانی نێوان تەلئەبیب و دیمەشق پێشکەوتنی گەورەیان بەخۆوە بینیوە و چاوەڕوان دەکرێت لە ئاییندەیەکی نزیکدا ڕێککەوتنێکی مێژوویی لە نێوانیاندا واژۆ بکرێت.

وێنە گەورەکە: لە بەرامبەر ئەم هەنگاوانەدا، ئیسرائیل مەرجی قورسی بۆ کشانەوە لەو نۆ خاڵە سەربازییە داناوە کە دوای ڕووخانی ڕژێمەکەی بەشار ئەسەد کۆنترۆڵی کردوون. تەلئەبیب داوای سووریا بۆ کشانەوەی دەستبەجێ ڕەت دەکاتەوە و مەرجی چۆڵکردنی ئەو ناوچانەی بەستووەتەوە بە واژۆکردنی "ئاشتییەکی گشتگیر"، نەک تەنیا ڕێککەوتنێکی ئەمنیی سادە.

چیرۆکی سەرەکی: کەناڵی "i24News"ـی ئیسرائیلی لە زاری سەرچاوەیەکی نزیک لە سەرۆکی سووریاوە بڵاوی کردەوە، هەوڵ و نێوەندگیریی چڕی دۆناڵد ترەمپ، سەرۆکی ئەمریکا، بووەتە هۆی نزیکبوونەوەی هەردوو وڵات. پێشبینی دەکرێت ڕێوڕەسمی واژۆکردنی ڕێککەوتننامەکە لە وڵاتێکی ئەوروپی بەڕێوە بچێت.

- بەپێی هەمان سەرچاوە، ئەگەری زۆرە ڕێککەوتنەکە لە ڕێگەی کۆبوونەوەیەکی ڕاستەوخۆ لە نێوان ئەحمەد شەرع، سەرۆکی سووریا و بنیامین ناتانیاهۆ، سەرۆکوەزیرانی ئیسرائیل واژۆ بکرێت؛ ئەمەش وەک وەرچەرخانێکی گەورە لە پەیوەندییەکانی هەردوو وڵاتدا دەبینرێت.

لەلایەکی دیکەوە: مانگی ڕابردوو ئەسعەد شەیبانی، وەزیری دەرەوەی سووریا ئاشکرای کرد، ڕێککەوتنە نوێیەکە لەسەر بنەمای ئاگربەستی ساڵی 1974 دەبێت، بەڵام بە جیاوازیی ئەوەی کە ناوچەی "دابڕاو" لە نێوان هەردوو سوپا دروست ناکرێت.