هەشت وڵات داوای گەیاندنی بەپەلەی هاوکارییەکان بۆ غەززە دەکەن

ئاڤا نیوز

وەزیرانی دەرەوەی هەشت وڵاتی عەرەبی و ئیسلامی لە ڕاگەیەنراوێکی هاوبەشدا داوایان کرد هاوکارییە مرۆییەکان بەبێ هیچ ئاستەنگێک و دەستبەجێ بگاتە کەرتی غەززە، هۆشداریشیان دا لەوەی دۆخی مرۆیی ناوچەکە گەیشتووەتە ئاستێکی کارەساتبار.

 

ڕاگەیێنراوی فەرمی: وەزیرانی دەرەوەی سعوودیە، میسر، ئوردن، ئیمارات، ئەندەنوسیا، پاکستان، تورکیا و قەتەر دەڵێن بەردەوامی بۆردومانەکان، گەمارۆی خنکێنەر و خراپیی کەشوهەوا، هەڕەشەیەکی بێپێشینەی لەسەر ژیانی 1.9 ملیۆن ئاوارەی فەلەستینی لە کەرتی غەززە دروست کردووە.

 

زانیاریی زیاتر: لە ڕاگەیێنراوەکەدا هاتووە: وەرزی زستان و بارانبارین، خێوەتگەکانی ئاوارەکانی کردووەتە ناوچەی کارەساتبار و تێکەڵبوونی "برسێتی و سەرمای توند" مەترسی بڵاوبوونەوەی نەخۆشییە گشتگیرەکان، بەتایبەت لەناو ژنان، منداڵان و بەساڵاچوواندا زیاد دەکات.

 

لەلایەکی دیکە: ئەم وڵاتانە داوایان لە ئیسرائیل کرد ڕێگە بە چوونەژووەرەوەی هاوکارییە مرۆییەکان بدات و ڕێگەی "بەردەوام و بێ مەرج" بۆ چوونە ناوەوەی کەلوپەلە سەرەکییەکانی وەک خێوەت، دەرمان، ئاوی پاک و سووتەمەنی بکاتەوە و ڕێ لە کاری ڕێکخراوە نێودەوڵەتییەکان نەگرێت.