لە چەند ڕۆژی داهاتوودا مەزڵووم عەبدی سەردانی دیمەشق دەكات

ئاڤا نیوز

 

وتەبێژی شاندی دانوستاندنكاری ئیدارەی خۆسەر ڕایدەگەیێنێت، دواخستنی سەردانەكەی مەزڵووم عەبدی بۆ دیمەشق، بە هۆكاری تەكنیكی بووە و تا ئێستاش وادەیەكی فەرمی بۆ سەردانەكەی دیار نەكراوە، بەڵام بەئەگەری زۆرەوە تا ڕۆژی 10ـی ئەم مانگە دەبێت.

 

چیرۆكی سەرەكی: بەمەبەستی جێبەجێكردنی ڕێككەوتنی 10ـی ئازاری ساڵی ڕابردووی نێوان هەسەدە و دیمەشق و لادانی بەربەستەكان لەبەردەم ڕێككەوتنەكە، وا بڕیارە مەزڵووم عەبدی، فەرماندەی گشتیی هێزەكانی سووریای دیموكرات 'هەسەدە' لەگەڵ ئەحمەد شەرع، سەرۆكی حكومەتی نوێی سووریا كۆ ببێتەوە.

 

لێدوانی فەرمی: مەریەم ئیبراهیم، وتەبێژی شاندی دانووستانكاری ئیدارەی خۆسەر لەگەڵ حكومەتی نوێی سووریا، لە لێدوانێكی بۆ میدیاكانی نزیك لە هەسەدە ئاماژەی بە ئەوە كردووە، سەردانی مەزڵووم عەبدی بۆ دیمەشق بەهیچ جۆرێك هەڵنەوەشاوەتەوە، بەدڵنیاییەوە گفتوگۆ لەگەڵ حكومەتی دیمەشق دەكەین لەسەر پرسەكانی پاراستنی ئەمنییەتی ناوچەكانی ئیدارەی خۆسەر و ڕووبەڕووبوونەوەی تیرۆر بەهاوبەشی.

 

- وتەبێژی شاندی دانووستاندنكاری خۆسەر وتیشی، بەپێی ڕێككەوتنی 10ـی ئازار، پاراستنی ئەمنییەتی ناوچەكانی ژێر دەسەڵاتی ئیدارەی خۆسەر لە ئەستۆی هەسەدە دەمێنێتەوە و سوپای سوریا نابێت بە هیچ جۆرێک بچێتە ئەو ناوچانە.

 

پەیوەست بەم بابەتە؛ لە چەند ڕۆژی ڕابردوودا ساڵح موسلیم، ئەندامی ئەنجوومەنی هاوسەرۆكایەتیی پارتی یەكێتیی دیموكرات 'پەیەدە' ڕایگەیاندووە، هەسەدە و دیمەشق ڕێككەوتنێكی نوێ لەسەر پرسی پاراستنی ئەمنییەت دەكەن.

باسی لەوەشكردووە، هەر ڕێککەوتنێکی نێوان ئیدارەی خۆسەر و دیمەشق، بە چاودێریی ڕاستەوخۆی ئەمەریکا دەبێت.