ترەمپ: مادورۆ و هاوسەرەکەی دەستگیر کران

ئاڤا نیوز

 

دۆناڵد ترەمپ، سەرۆکی ئەمریکا ڕایگەیاند، نیکۆلاس مادورۆ، سەرۆکی ڤەنزوێلا و ژنەکەی دەستگیر کراون و براونەتە دەرەوەی خاکی ڤەنزوێلا.

 

چیرۆکی سەرەکی: دوای چەند مانگێک لە گرژیی نێوان ئەمریکا و ڤەنزوێلا، دواجار ئەمڕۆ شەممە ئەمریکا هێرشی بۆ سەر ڤەنزوێلا ئەنجام دا و نیکۆلاس مادورۆ، سەرۆکی وڵاتەکە و خێزانەکەی دەستگیر کران.

 

لێدوانی فەرمی: دۆناڵد ترەمپ، سەرۆکی ئەمریکا لە تۆڕی کۆمەڵایەتیی تروس سۆشیاڵ بڵاوی کردەوە، هێرشێکی سەرکەوتوومان لە دژ ڤەنزوێلا ئەنجام دا و مادورۆ و خێزانەکەی دەستگیر کراون براونەتە دەرەوەی خاکی ڤەنزوێلا.

 

-دەشڵێت ئەم هێرشە بە هاوکاریی دەزگا یاساییەکانی ئەمریکا ئەنجامدراوە. ترەمپ دەشڵێت: کاتژمێر 11 بەکاتی ئەمریکا لەبارەی ئەم ئۆپەراسیۆنە کۆنفرانسێکی ڕۆژنامەوانی دەبێت.

 

بۆچوونی لایەنی بەرامبەر: دوای بڵاوکردنەوەی هەواڵی دەستگیرکردنی نیکۆلاس مادورۆ، حکومەتی ڤەنزوێلا داوای لە ئەمریکا کرد بەڵگەی ئەوەیان پێ بدەن کە ئایا مادورۆ و ژنەکەی لە ژیاندا ماون یاخوود نا.

 

باکگراوند: سەر لە بەیانیی ئەمڕۆ شەممە،  دەنگی حەوت تەقینەوەی بەهێز لە کاراکاسی پایتەختی ڤەنزوێلا بیسترا، بەگوێرەی زانیاریی میدیاکان تەقینەوەكان لە نزیك بنکەیەکی سەربازی لە باشووری پایتەختی وڵاتەکە ڕوویانداوە.