گەنجێکی سەیدسادق لەناو بەفری باکووری کوردستان ڕەق دەبێتەوە

ئاڤا نیوز

 

گەنجێکی قەزای سەیدسادق لەکاتی چوونی بەرەو ئەوروپا بەهۆی بەفر و سەرمای زۆرەوە لە باکووری کوردستان گیان لەدەست دەدات و تاوەکو ئێستا تەرمەکەی نەدۆزراوەتەوە.

 

چیرۆکی سەرەکی: گەنجێکی خەڵکی سەیدسادق بەناوی هەڵۆ وێنس کەریم، لە ڕۆژی چوارشەممە 26-12-2025، لە ماڵەوە دەرچووە و ویستویەتی ڕێگای ئەورووپا بگرێتەبەر، بەڵام بەهۆی سەرماوە لە دەوروبەری گوندێکی شرناغ لە باکووری کوردستان گیانی لەدەستداوە و تاوەکو ئێستا تەرمەکەی نەدۆزراوەتەوە.

 

لێدوانی فەرمی: ڕابەر لوقمان، ئامۆزای ئەو گەنجەیە و بە ئاڤای ڕاگەیاند، ئامۆزاکەم لەگەڵ هەشت کەسی دیکە ویستویانە بڕۆنە ئەورووپا، بەڵام بەهۆی بەفر و سەرمای زۆرەوە، لە دەورووبەریی گوندێکی سنووری شرناغ تەندروستیی تێکچووە و قاچەکانی سڕ بووە، ئەو هەشت کەسەشی لەگەڵی بوون، ماوەی کاتژمێر و نیوێک لەگەڵی ماونەتەوە و هاوکارییان کردووە، بەڵام کە کۆچی دوایی کردووە، ڕۆیشتوون و بەجێیان هێشتووە. 

 

زانیاریی زیاتر: بە گوتەی ڕابەر لوقمان، ڕۆژی پێنجشەممەی ڕابردوو 31-12-2025، لەڕێگەی قاچاخچییەکەیەوە ئاگادار کراونەتەوە، ئامۆزایەکەمان گیانی لە دەست داوە و لە ناو بەفر رەق بووتەوە. تەرمەکەشی کەوتووەتە ژێر بەفر و لە  دەوروبەری گوندێکی شرناغە، تاوەکو ئێستا نەدۆزراوەتەوە. 

 

لەلایەکی دیکەوە: ڕابەر لوقمان بە ئاڤای گوت، داوا لە لایەنە پەیوەندیدارەکان دەکەین سۆراغی تەرمی ئامۆزاکەم بکەن و بیگەڕێننەوە بۆ هەرێمی کوردستان.