چیرۆکی دزییەکی سەیر لە هەڵەبجە

ئاڤا نیوز

پۆلیسی هەڵەبجە تۆمەتبارێکی تەمەن 28 ساڵی دەستگیر کرد کە هەڵیکوتاوەتە سەر ماڵێک و بڕێکی زۆر ئاڵتوون و کەلوپەلی دزیوە. تۆمەتبارەکە بۆ ئەوەی ئاشکرا نەبێت، کامێرای چاودێریی ماڵەکەشی دزیوە، بەڵام بەهۆی بەستنەوەی کامێراکە بە مۆبایلی خاوەن ماڵەوە، ناسراوەتەوە و دەستگیر کراوە.

 

چیرۆکی سەرەکی: دزەکە دەستی گەیشتووە بە ئاڵتوون، سەعات و تەنانەت کەرەستەی جوانکاریی ئافرەتان و دزیونی، لە کۆتایشدا کاتێک کامێرای چاودێرییەکەی بینیوە، لێیکردۆتەوە و لەگەڵ خۆی بردوویەتی بەو خەیاڵەی بەڵگەی لەسەر خۆی نەهێشتووەتەوە، بێئاگا لەوەی سیستەمەکە ڕاستەوخۆ وێنەکان بۆ مۆبایلی خاوەن ماڵ دەنێرێت.

لێدوانی فەرمی: ئاکام قوتبەدین، وتەبێژی پۆلیسی هەڵەبجە ڕایگەیاند، ڕووداوەکە ئێوارەی 1ی1 کاتژمێر 7:13 خولەک لە گەڕەکی "گۆران ستی" ڕوویداوە. تۆمەتبارەکە کە دراوسێی ماڵەکە بووە، چاودێریی کردوون و کاتێک زانیویەتی لە ماڵ نین، دەرفەتەکەی قۆستۆتەوە.

 

زانیاریی زیاتر: دوای ئەوەی خاوەن ماڵ سکاڵای تۆمار کردووە، پۆلیس بە پشتبەستن بە بەڵگەکان دەستبەجێ تۆمەتبارەکەیان دەستگیر کردووە. تۆمەتبارەکە لە ئێستادا دانی بە تاوانەکەیدا ناوە و پەڕاوی لێکۆڵینەوەی بۆ کراوەتەوە.