ئاڤای خەڵک؛ لە گەرمیان بڕیاری گواستنەوەی دەستگێڕەکان بۆ گەراجێک ناڕەزایەتی لێ دەکەوێتەوە

ئاڤا نیوز

بڕیاری شارەوانیی قەزای ڕزگاری لە سنووری گەرمیان بۆ گواستنەوەی دەستگێڕەکان لە ناو بازاڕەوە بۆ ناو گەراجی پاسەکان، ناڕەزایی توندی لێکەوتەوە.

 

کێشەی سەرەکی: دەستگێڕەکان کە ژمارەیان 100 دەستگێڕە بژێوییان لەسەر فرۆشتنی سەوزە و میوە و پێداویستییە خۆراکییەکانە، ئاماژە بەوە دەدەن لە شوێنە نوێیەکەدا کەس سەردانیان ناکات و کاڵاکانیان بەسەردا دەمێنێتەوە.

 

ئەحمەد ڕەشید، یەکێک لە دەستگێڕەکان وەک نموونەی زیانەکان دەڵێت: "دوێنێ بە بڕی 100 هەزار دینار تەماتە و خەیارم کڕی، بەڵام تا ئێوارە تەنها 4 هەزار دینارم فرۆشتووە، ئەمەش حاڵی هەموومانە کە خەڵکێکی فەقیرین."

لێدوانی فەرمی: لای خۆیەوە ئەرسەلان ئەحمەد، سەرۆکی شارەوانی ڕزگاری هۆکاری بڕیارەکەی بۆ "سەلامەتی و سیمای شار" گەڕاندەوە و بە ئاڤای ڕایگەیاند، شوێنی پێشووی دەستگێڕەکان مەترسیی کۆبوونەوەی ئاو و لافاوی لەسەر بوو، وەک چۆن لە دواین شەپۆلی بارانباریندا زیانیان بەرکەوت، بۆیە ئێستا گواستراونەتەوە بۆ شوێنێکی گونجاوتر.