دەستەی مافی مرۆڤ بەدواداچوون بۆ سیستمی گەرمکەرەوەی چاکسازیی گەورانی هەولێر دەکات

ئاڤا نیوز

 

بەڕێوەبەری گشتیی یاسا و پاراستنی مافی مرۆڤ لەبارەی خزمەتگوزارییەکانی ناو چاکسازیی گەورانی هەولێر دڵنیایی دەدات و دەڵێت: سیستمی گەرمکەرەوە و ئاوی گەرم لە هۆڵەکانی ئەو چاکسازییە هیچ کێشەی نییە.

 
وێنە گەورەکە: لە ماوەی ڕابردوودا سزادراوێکی چاکسازیی گەورانی هەولێر لە ڕێگای بریکارەکەی ڕایگەیاندبوو لە هۆڵەکانی چاکسازی کێشە لە سیستمی گەرمکەرەوە و ئاوی گەرم هەیە و سزادراون درەنگ خۆیان دەخۆشن؛ دەستەی مافی مرۆڤ بەدواداچوونی بۆ ئەم بابەتە کرد.

 

چیرۆکی سەرەکی: ئەمڕۆ یەکشەممە 4-1-2026 تیمێکی دەستەی سەربەخۆی مافی مرۆڤ بەسەرپەرشتیی بەڕێوەبەری گشتیی یاسایی و پاراستنی مافی مرۆڤ، سەردانی بەڕێوەبەرایەتیی چاکسازیی گەورانی هەولێریان کرد.

 
لێدوانی فەرمی: تاڤگە عومەر، بەڕێوەبەری گشتیی یاسا و پاراستنی مافی مرۆڤ بە ئاڤا میدیای ڕاگەیاند: بەپێی یاسای ژمارە چواری ساڵی 2010، تیمی دەستەی مافی مرۆڤ بەشێوەیەکی بەردەوام لە حاڵەتی ئاسایی و نائاساییدا بەدواداچوون بۆ تەواوی چاکسازییەکانی هەرێمی کوردستان و بنکەکانی گرتن و گواستنەوە دەکات و چاودێرە لەسەر پێشکەشکردنی پێداویستی و خزمەتگوزارییەکان بۆ سزادراوان.

 

- تاڤگە عومەر دەشڵێت: سەردانی هۆڵەکانی چاکسازیمان کرد و بەدواداچوونمان بۆ ئەم بابەتە کرد، دەرکەوت ئاوی گەرم و گەرمکەرەوەی هۆڵەکانیان کێشەی نییە.

ئەمەش بزانە: نزیکەی دوو هەزار سزادراو لە چاکسازىی گەورانی هەولێر لەوێ ماوەی سزاکانیان بەسەردەبەن.

 

لەلایەکی دیکە: ئیدارەی چاکسازی دڵنیایی ئەوەیان داوە کە تەواوی پێداویستییەکانی وەرزی زستان و گەرمکەرەوە بۆ هۆڵەکانی چاکسازی دابین کراون، بەڕێوەبەرایەتى چاکسازىی گەورانی هەولێر دەڵێت: بەمەبەستی لە نزیکەوە ئاگادار بوون لە ڕەوشی سزادراوان، بەڕێوەبەر و ئیدارەی چاکسازی هەموو هەفتەیەک سەردانی مەیدانی بۆ ناو هــۆڵی سزادراوان دەکەن، جەخت لە خزمەتگوزارییەکان و جێبەجێكردنی مافی سزادراوان دەکەنەوە بەپێی یاسا و ڕێنماییەكانی چاكسازی.