هەیبەت حەلبووسی یەکەم "پێشێلکاریی دەستووری" ئەنجام دا

ئاڤا نیوز

ئەندامێکی هاوپەیمانی عەزم لە پەرلەمانی عێراق دەڵێت، سەرۆکی پەرلەمان بە نووسراوێک "پێشێلکارییەکی دەستووری" کردووە و پارێزگاری سەڵاحەددینی بۆ سەر پۆستەکەی گەڕاندووەتەوە، لە کاتێکدا ناوبراو سوێندی یاسایی خواردووە و بووەتە پەرلەمانتار.

چی ڕوودەدات: هەرچەندە سەرەتای ئەم مانگە سوێندی یاسایی خوارد و بووە ئەندامی پەرلەمانی عێراق، بەڵام بەدر فەحل ئەمڕۆ وەک پارێزگاری سەڵاحەددین دەرکەوتەوە و دەڵێت، سەرۆکایەتیی پەرلەمان پێی ڕاگەیاندووە کە دەبێت سەرەتا بە شێوەیەکی یاسایی لە پۆستی پارێزگار دەست لە کار بکێشێتەوە، ئینجا بێتە پەرلەمان و ببێتە پەرلەمانتار.

لێدوانی فەرمی: ئیبراهیم نامس، ئەندامی پەرلەمانی عێراق لە هاوپەیمانی عەزم، ئەمڕۆ کۆنفرانسێکی ڕۆژنامەوانیی ئەنجام دا و ئاماژەی بەوەش کرد، نووسراوەکەی سەرۆکایەتیی پەرلەمان و هەڵوەشاندنەوەی سوێندخواردنی بەدر فەحل "پێشێلکردنی دەستوورە و بڕیارەکەش بە میزاجی سیاسی دراوە".

٠ دەشڵێت، پێویستە ئەنجوومەنی پارێزگای سەڵاحەدینیش هەنگاوی پێویست بۆ چارەسەرکردنی ئەم پێشێلکارییە بگرێتە بەر.