دادگای هەولێر فەرمانی دەستگیرکردنی بۆ پەرلەمانتارێکی هاوپەیمانیی تەقەدووم دەرکرد

ئاڤا نیوز

دادگای لێکۆڵینەوەی هەولێر فەرمانی دەستگیرکردنی بۆ "شەهەد ئەحمەد خەلیل"، پەرلەمانتاری فراکسیۆنی تەقەدووم لە ئەنجوومەنی نوێنەرانی عێراق دەرکرد.

چیرۆکی سەرەکی: بەپێی نووسراوێکی فەرمی دادگای لێکۆڵینەوەی هەولێر، بە فەرمی فەرمانی دەستگیرکردنی بۆ پەرلەمانتار "شەهەد ئەحمەد خەلیل" دەرکردووە، کە نوێنەری پارێزگای سەڵاحەددینە لە پەرلەمانی عێراق و ئەندامی هاوپەیمانیی تەقەدوومە (بە سەرۆکایەتیی محەممەد حەلبووسی).

زانیاریی زیاتر: فەرمانی دەستگیرکردنی ئەو پەرلەمانتارە لەسەر بنەمای سکاڵایەکی یاسایی بووە کە لەلایەن وەزارەتی ناوخۆی هەرێمی کوردستانەوە تۆمار کراوە. هۆکارەکەشی بۆ ئەوە دەگەڕێتەوە کە ناوبراو نووسراوی فەرمی دەوڵەتی تەزویر کردووە و بە شێوەی خۆ بە گەورە زانین نووسراوەکانی هێناوە بۆ دادگا، دواتر دەرکەوتووە نووسراوەکە تەزویرە.

لێدوانی فەرمی: دادگای هەولێر لە هۆکاری دەرکردنی فەرمانەکەدا ڕایگەیاند: پەرلەمانتارەکە نووسراوی فەرمیی دەوڵەتی تەزویر کردووە و بە شێوەی خۆ بە گەورە زانین نووسراوەکانی هێناوە بۆ دادگا، بەڵام دوای لێکۆڵینەوە دەرکەوتووە کە ئەو بەڵگەنامانە تەزویرن.

ئەمەش بزانە: دوای دەرچوونی ئەم فەرمانە، چاوەڕوان دەکرێت دادگای هەولێر لە ڕێگەی ئەنجوومەنی باڵای دادوەریی عێراقەوە، داوا لە پەرلەمان بکات پارێزبەندی لەسەر ئەو پەرلەمانتارە لابدات. بەپێی یاسا، تاوەکو پارێزبەندی لایەن پەرلەمانەوە لانەبرێت، ڕێکارەکانی دەستگیرکردن جێبەجێ ناکرێن، مەگەر لە حاڵەتی "تاوانی کتوپڕ"دا بێت.