بە تەواوبوونی پڕۆژەیەکی ئاو لە بەردەڕەش 250 بیر دادەخرێن

ئاڤا نیوز

پڕۆژەی ستراتیژیی ئاوی بەردەڕەش بە گوژمەی 400 ملیار دینار چووەتە قۆناغی جێبەجێکردنەوە و بە تەواوبوونیشی 250 بیری ئاوی خواردنەوە لە ناوچەکە دادەخرێن.

چیرۆکی سەرەکی: پڕۆژەی ستراتیژیی ئاوی بەردەڕەش کە یەکێکە لە گەورەترین پڕۆژەکانی سنووری پارێزگای دهۆک، بە گوژمەی زیاتر لە 400 ملیار دینار دەستی بە کارەکانی کرد؛ ئەو پڕۆژەیە دەکەوێتە سەر زێی گەورە و بە دووریی دوو کیلۆمەتر لە گوندی دالەڕێ دروست دەکرێت، کە پێکدێت لە وەرگری ئاو و وێستگەی پاڵاوتنی ئاو. هەروەها 39 عەمباری ئاو بە قەبارەی جیاواز بۆ پڕۆژەکە دروست دەکرێن بۆ گەیاندنی تۆڕی ئاو بۆ قەزا، ناحیە و گوندەکان، کە زیاتر لە 95 گوند لێی سوودمەند دەبن.

لێدوانی فەرمییەکان: خەڵات ئەبابەکر، بەڕێوەبەری ئاوی دەوروبەری دهۆک بە ئاڤای ڕاگەیاند: نەخشەی پڕۆژەکە تەواو بووە، کارکردن لە ڕێگە سەرەکییەکان و ڕێگەی بورجەکانی کارەبا دەکرێت؛ ڕۆژانە دەیان ئامێر لە 10 شوێنی جیاوازدا کار لە پڕۆژەکەدا دەکەن و بڕیارە پێش وادەی دیاریکراو کارەکانی تەواو بکرێن.

٠ ڕێبەر نازم خورشید، بەڕێوەبەری ئاوی بەردەڕەش بە ئاڤای ڕاگەیاند: پڕۆژەی ستراتیژیی ئاوی بەردەڕەش دەستی بە کارەکانی کردووە و ڕۆژانە زیاتر لە 80 ئامێر لە 10 شوێندا کار دەکەن.

بەڕێوەبەری ئاوی بەردەڕەش ئاماژەی بەوە کرد: سەرەڕای وەرزی زستان و هاتنی بارانی بەردەوام، کۆمپانیا لە کارکردن بەردەوامە و زۆر بەخێرایی کار دەکەن؛ بڕیارە لە ماوەی ساڵێک و پێنج مانگدا پڕۆژەکە تەواو بکرێت کە ماوەی دوو ساڵی بۆ دانراوە، بەڵام کۆمپانیا زۆر جددییە و دەیەوێت بە زووترین کات پڕۆژەکە تەواو بکات. بە تەواوبوونی پڕۆژەکەش، 250 بیری ئاوی خواردنەوە دادەخرێن و هیچ بیرێک بۆ ئاوی خواردنەوە نامێنێت.

زانیاریی زیاتر: لە کابینەی نۆیەمی حکومەتی هەرێمی کوردستان بڕیار لەسەر پڕۆژەی ستراتیژیی ئاوی بەردەڕەش درا. پڕۆژەکە پێکهاتووە لە وەرگری ئاو، وێستگەی پاڵاوتن و 39 عەمباری ئاو بە قەبارەی جیاواز بۆ گەیاندنی ئاو بە قەزا، ناحیە و گوندەکان. کۆمپانیاکە زۆر بەخێرایی کار دەکات بۆ ئەوەی زووتر لە کاتی دیاریکراو پڕۆژەکە ڕادەست بکات و کێشەی کەمئاوی لەو سنوورە بە یەکجاری چارەسەر ببێت.