مووچەی مانگی یەکی فەرمانبەرانی هەرێمی کوردستان خەرج دەکرێت

ئاڤا نیوز

تەیف سامی، وەزیری دارایی عێراق، ڕەزامەندیی لەسەر خەرجکردنی مووچەی مانگی یەکی فەرمانبەرانی هەرێمی کوردستان دەربڕیوە و وەزارەتی دارایی هەرێمی کوردستانیش دەڵێت ئەگەر سبەی خەرج بکرێت ڕۆژی چوارشەممە دەست بە دابەشکردنی دەکرێت. 

چیرۆکی سەرەکی: ئەمڕۆ دووشەممە 9-2-2026، تەیف سامی، وەزیری دارایی عێراق، ڕەزامەندیی لەسەر خەرجکردنی مووچەی مانگی 1ـی هەرێمی کوردستان دەربڕیوە، بەپێی زانیارییەکان، بڕیار بوو پاشنیوەڕۆی ئەمڕۆ ڕێکارەکان بەتەواوی کۆتاییان بێت، بەڵام بەهۆی هەڵەیەک لە کۆکردنەوەی بڕی پارەی توێژە جیاوازەکان (فەرمانبەران، خانەنشینان و کەسوکاری شەهیدان)، وەزیری دارایی نووسراوەکەی ناردووەتەوە بۆ بەشی بودجە تاوەکو چاک بکرێتەوە. چاوەڕوان دەکرێت سبەی سێشەممە نووسراوەکە واژۆ بکرێت و پارەکە ڕەوانەی هەولێر بکرێت.

لێدوانی فەرمی: بەرپرسێکی باڵای حکومەتی عێراق بە ئاڤای ڕاگەیاند، سبەی سێشەممە هەڵەکە چاک دەکرێتەوە و تەیف سامی ئیمزای دەکات و پارە ڕەوانە دەکرێت.

لەلایەکی دیکەوە: وەزارەیی دارایی کوردستانیش لەوبارەیەوە بە ئاڤای ڕاگەیاند، ئەگەر سبەی پارە بنێردرێت، دوای نیوەڕۆ خشتەی دابەشکردنی مووچە بڵاو دەکەنەوە و چوارشەممە دەست بە دابەشکردنی دەکرێت هەم بە کاش و هەم بە دیجیتاڵی لە ڕێگەی هەژماری من. خشتەکەش هاوشێوەی مانگی ڕابردووە و بە سێ ڕۆژ دابەش دەکرێت.