مەزڵووم عەبدی دەڵێت دەروازەی سێمالکا وەک خۆی دەمێنێتەوە لەگەڵ هەرێمی کوردستان

ئاڤا نیوز

 

ئەمڕۆ مەزڵووم عەبدی، فەرماندەی گشتیی هەسەدە، لە کۆبوونەوەیەکی فراواندا لەگەڵ خەڵکی حەسەکە و ئاوارەکانی ناوچەکانی سەرێکانی و عەفرین، وردەکارییەکانی رێککەوتنی 29ـی کانوونی دووەمی لەگەڵ حکوومەتی کاتی تاووتوێ کرد.

لێدوانی فەرمی: فەرماندەی گشتیی هەسەدە، رایگەیاند: بەپێی رێککەوتنی نوێ لەگەڵ حکومەتی کاتی، دامەزراوەکانی بەڕێوەبەریی خۆسەر لە چوارچێوەی دامەزراوەکانی دەوڵەتدا تێکەڵ دەکرێن و گۆڕانکاریی پێکهاتەییان تێدا دەکرێت، هاوکات دڵنیایی دایە ئاوارەکانی عەفرین و سەرێکانی کە مافەکانیان دەپارێزرێت.

مەزڵووم عەبدی دەڵێت: "تەواوی ئەو دامەزراوانەی ئێستا سەر بە بەڕێوەبەریی خۆسەرن، لە کارەکانیان بەردەوام دەبن، بەڵام لە چوارچێوەی پڕۆسەیەکدا لەگەڵ دامەزراوەکانی دەوڵەت تێکەڵ دەکرێن. بەپێی رێککەوتنەکە، ئەو وەزارەت و دەستانەی ئێستا هەن، پلەکەیان بۆ ئاستی بەڕێوەبەرایەتیی دەگۆڕدرێت و رێکدەخرێنەوە."

- لەبارەی دەروازە سنوورییەکان، فەرماندەی گشتیی هەسەدە ئاماژەی بەوە کرد، "دەروازەی سێمالکا وەک خۆی دەمێنێتەوە"، بەڵام ئۆفیسێکی تایبەت بە حکومەتی کاتی لێ دەکرێتەوە بۆ سەرپەرشتیکردنی کاروباری دەروازەکە."

 

ئەوەی پێویستە بیزانیت: دەروازەی سێمالکا تاکە دەروازەی نێوان هەرێمی کوردستان و ڕۆژئاوای کوردستانە، ڕۆژانە هاتووچۆی خەڵک لەو دەروازەیە هەیە و لە کاتی هێرشەکانی چەکدارانی سوپای عەرەبیی سووریا کۆمەک و هاوکارییەکان لەو دەروازەیە ڕەوانەی ڕۆژئاوای کوردستان دەکرا، بەتایبەت هاوکارییەکانی دەزگای خێرخوازی بارزانی. 

لەلایەکی دیکەوە: لەبارەی  لایەنی سەربازی، فەرماندەی گشتیی هەسەدە، وتی: "وەک هەنگاوی یەکەم لیوایەکی سەربازیی هەسەدە لە شاری حەسەکە، قامشلۆ و دێرک جێگیر دەکرێت، هێزەکانی دیکەش بەپێی پلانە نوێیەکان لە ناوچەکانی دیکە بڵاوەیان پێ دەکرێتەوە، ئەمەش وەک بەشێک لە ڕێککەوتنەکە بۆ ڕێکخستنەوەی دۆخی ئەمنیی ناوچەکە."