هاوپەیمانیی ئیدارەی دەوڵەت لەبارەی دیاریکردنی پۆستی سەرۆککۆمار کۆبووەوە

ئاڤا نیوز

بافڵ تاڵەبانی، سەرۆکی یەکێتیی نیشتمانیی کوردستان لە کۆبوونەوەی هاوپەیمانی ئیدارەی دەوڵەت، ڕایگەیاند لەگەڵ پارتی دیموکراتی کوردستان لێکنزیکبوونەوەی باشیان هەیە بۆ دیاریکردنی کاندیدێکی هاوبەش بۆ پۆستی سەرۆککۆمار و بڕیارە ڕۆژی چوارشەممە بۆ ڕێککەوتنی کۆتایی کۆببنەوە.

چیرۆکی سەرەکی: دوێنێ یەکشەممە 8-2-2026، هاوپەیمانیی ئیدارەی دەوڵەت بە بەشداریی لایەنە سەرەکییەکانی پێکهێنەری حکومەتی عێراق لە نووسینگەی محەممەد شیاع سوودانی کۆبوونەوە. لەم دیدارەدا کە فوئاد حوسێن (لەسەر پشکی پارتی) و بافڵ تاڵەبانی (سەرۆکی یەکێتی) بەشدار بوون، پرسی کاندیدی سەرۆککۆمار تەوەرێکی سەرەکی بوو. 

زانیاریی زیاتر: بافڵ تاڵەبانی، سەرۆکی یەکێتی لە کۆبوونەوەکەدا ڕایگەیاندووە کە لەگەڵ پارتی دیموکراتی کوردستان کۆبوونەوەیەکی باشیان هەبووە و لێک نزیکبوونەوەی باش هەیە لەنێوانیاندا لەبارەی دیاریکردنی کاندیدێکی هاوبەش بۆ پۆستی سەرۆککۆمار.

زانیاریی تایبەت: ئاڤا نیوز زانیویەتی کە ئەگەر هەردوو حزب لەسەر ئەم پۆستە ڕێکبکەون، یەکسەر پڕۆسەی پێکهێنانی حکومەتی نوێی هەرێمی کوردستانیش دەستپێدەکات. ئەمە وەک هەنگاوێکی ستراتیژی دەبینرێت بۆ یەکخستنی ماڵی کورد پێش چوونە ناو پەرلەمانی عێراق بۆ دەنگدان بە سەرۆککۆماری نوێ.