کۆمسیۆنی هەڵبژاردنەکان: سبەی پارەی پاداشتی کارمەندانی دەنگدان لە سێ پارێزگا خەرج دەکرێت

ئاڤا نیوز

کۆمسیۆنی هەڵبژاردنەکان پارەی پاداشتی کارمەندانی سەر سندووقەکانی دەنگدانی لە سێ پارێزگا خستە سەر هەژمارە بانکییەکان و وادەی وەرگرتنی کارتەکانی ماستەر کارتی بە فەرمی ڕاگەیاند.

لێدوانی فەرمی: جومانە غەلای، گوتەبێژی کۆمسیۆنی باڵای سەربەخۆی هەڵبژاردنەکان ڕایگەیاند: پاداشتەکان هەریەک لە پارێزگاکانی بەسرە، دهۆک و مەیسان دەگرێتەوە، کە تێیدا لە ڕێگەی کارتی بانکییەوە دەگاتە دەستی کارمەندان تاوەکو تەواوی شایستە داراییەکانی خۆیان بە ئاسانی وەربگرن.

جومانە غەلای، دەڵێت: "سبەی سێشەممە، کارتەکان لە 41 ناوەندی تۆمارکردن لە مەیسان و دهۆک، هەروەها لە 76 ناوەندی دیکە لە بەسرە بەسەر کارمەندانی دەنگداندا بە شێوەیەکی ڕێکخراو دابەش دەکرێن."

٠ پێویستە کارمەندان سەردانی ناوەندەکانی تۆمارکردن بکەن بۆ وەرگرتنی کارتەکان.

٠ کۆمسیۆن بە هەماهەنگی لەگەڵ بانکی ڕافیدەین خەریکی ئامادەکردنی تەواوی کارتەکانی دیکەی سەرجەم پارێزگاکانی دیکەی وڵاتە.

٠ ڕێژەی دابەشکردنی کارتەکان گەیشتووەتە 90٪ و کۆمسیۆنیش بەردەوام دەبێت لە خستنە ناوەوەی پارە بۆ سەر هەژمارەکان بە شێوەیەکی پلەبەندی، تاوەکو سەرجەم کارمەندانی دەنگدان مافە داراییەکانیان وەربگرن.

زانیاریی زیاتر: بەگوێرەی زاناریییەکانی کۆمسیۆن کرێ فەرمانبەران، خوێندکاران و دەرچووان بەمشێوەیە دەبێت:

یەکەم: کرێی فەرمانبەرانی حکومی بەم شێوەیەی خوارەوە دەبێت:

• هەماهەنگیکاری بنکەی دەنگدان: بڕی (300,000) سێسەد هەزار دینار، تەنیا بۆ یەک ڕۆژی دەنگدان (تایبەت یان گشتی).
• بەڕێوەبەری وێستگەی دەنگدان: بڕی (200,000) دووسەد هەزار دینار، تەنیا بۆ یەک ڕۆژی دەنگدان (تایبەت یان گشتی).
• کارمەندی بنکە یان وێستگە: بڕی (150,000) سەد و پەنجا هەزار دینار، تەنیا بۆ یەک ڕۆژی دەنگدان (تایبەت یان گشتی).

دووەم: کرێی خوێندکاران و دەرچووان بەم شێوەیەی خوارەوە دەبێت:

• هەماهەنگیکاری بنکەی دەنگدان: بڕی (400,000) چوارسەد هەزار دینار، تەنیا بۆ یەک ڕۆژی دەنگدان (تایبەت یان گشتی).
• بەڕێوەبەری وێستگەی دەنگدان: بڕی (300,000) سێسەد هەزار دینار، تەنیا بۆ یەک ڕۆژی دەنگدان (تایبەت یان گشتی).
• کارمەندی بنکە یان وێستگە: بڕی (250,000) دووسەد و پەنجا هەزار دینار، تەنیا بۆ یەک ڕۆژی دەنگدان (تایبەت یان گشتی).

سێیەم: کرێی کارمەندانی یەدەگ (کە ڕێژەیان 5%ـی کۆی کارمەندانە) بەم شێوەیەیە:

• فەرمانبەری حکومی: بڕی (50,000) پەنجا هەزار دینار، لەگەڵ پێدانی نووسراوی (سوپاس و پێزانین).
• خوێندکار یان دەرچوو: بڕی (100,000) سەد هەزار دینار.

چوارەم: ڕێگە نادرێت کرێی کارکردنی هەردوو ڕۆژی دەنگدانی تایبەت و گشتی پێکەوە وەربگیرێت.

پێنجەم: ئەگەر پێویست بکات کارمەندێک لە هەردوو ڕۆژی دەنگدانی تایبەت و گشتیدا کار بکات، ئەوا کرێی یەکێک لە ڕۆژەکانی بۆ هەژمار دەکرێت و بڕی (100,000) سەد هەزار دیناری وەک قەرەبووی کارکردنی لە ڕۆژی دووەمدا بۆ زیاد دەکرێت.

شەشەم: پێشکەشکار خۆی تێچووی پەسەندکردنی بەڵێنامەکان و ڕەسمی خەرجکردنی پاداشتەکە دەگرێتە ئەستۆ.