هۆکاری بەرزبوونەوەی بەهای دینار بەرامبەر بە دۆلار ئاشکرا دەکرێت

ئاڤا نیوز

بەهای دینار بەرامبەر بە دۆلار بەردەوام لە گۆڕانکاریدایە و پسپۆڕانی بواری ئابووری و دارایی پێیانوایە، کە دوای پێکهێنانی کابینەی نوێی حکومەتی عێراق و لابردنی سیستەمی ئەسیکۆدا، بەهای دینار بەشێوەیەکی بەرچاو بەرامبەر بە دۆلار بەرزدەبێتەوە.

لێدوانی فەرمی: کەیفی خۆشناو، وتەبێژی بازاڕی دراوی هەولێر بە ئاڤای ڕاگەیاند، دوێنێ یەکشەممە بەهای 100 دۆلار بە 150 هەزار دینار مامەڵەی پێوە دەکرا، بەڵام ئەمڕۆ بە 149 هەزار و 750 دینار مامەڵەی پێوەدەکرێت.

ئاماژەی بەوەشکرد، بەهۆی سیستەمی ئەسیکۆداوە بازرگانەکان بۆ کڕینی دۆلار ڕوویان لە بازاڕەکان کردووە، چونکە نایانەوێ ناویان بچێتە نێو سیستەمەکە و ناچار بەوە بکرێن کە باجێکی زۆر بدەن.

لەلایەکی دیکەوە: سەربارەت بە هۆکارەکانی جێگیرنەبوونی بەهای دینار بەرامبەر بە دۆلار و سیستەمی ئەسیکۆدا، د.مستەفا مەلا حەسەن، پسپۆڕی ئابووری و پێشکەشکاری زەنگی بازاڕ لە ئاڤا ئاماژە بەوە دەکات، پێکهێنانی کابینەی نوێی حکومەتی عێراق و یەکەمین وتاری سەرۆکوەزیرانی نوێ و خستنەڕووی کارنامەکەی و سیاسەتی نەختینە، بەتایبەت لەسەر سیستەمی ئەسیکۆدا کاریگەری ڕاستەوخۆی لەسەر بەهای دینار دەبێت.

زانیاریی زیاتر: د. مستەفا ئاماژەی بەوەشدا، بازرگانان لە دانانی سیستەمی ئەسیکۆدا ناڕازین، پێشبینی دەکەم کە سەرۆکوەزیرانی نوێ سیستەمی ئەسیکۆدا جێبەجێ نەکات، ئەمەش کاریگەری لەسەر بەرزبوونەوەی بەهای دینار بەرامبەر بە دۆلار دەبێت.