ساڵانە چوار هەزار تۆن هەنگوینی سێواس ڕەوانەی بازاڕەکانی جیهان دەکرێت

ئاڤا نیوز 

لە ڕێگای کۆمپانیایەک هەنگوینی سێواسی باکووری کوردستان دەگەیەنێرێتە بازاڕە جیهانییەکانی ئەوروپا، ئاسیا، ئەمریکا و کەنەدا، ساڵانە چوار هەزار تۆنی لێ دەفرۆشرێت.

لێدوانی فەرمی: ئیبراهیم دۆغان، خاوەنی کۆمپانیاکە بە میدیای تورکی ڕاگەیاندووە: "ئەوان هەنگوین لە هەنگەوانانی ناوچەکانی سێواس، ئەرزنجان و ئەرزەڕۆم دەکڕنەوە، چونکە هەنگەکان شیلەی گوڵە سروشتی و خۆڕسکەکانی کوێستانەکانی کوردستان دەمژن، کوالێتیی هەنگوینەکە زۆر بەرزە و خواستی زۆری لەسەرە."

دۆغان، دەشڵێت: "هەنگوینی شانە، یەکێکە لە بەرهەمە هەرە داواکراوەکان و بە تەواوی سروشتییە."

زانیاریی زیاتر: ناوەندی سەرەکیی دابەشکردنی کۆمپانیاکە لە نەمسایە و لەوێوە بەرهەمەکانیان بۆ فەرەنسا، ئەڵمانیا، ئیتاڵیا، بەریتانیا و تەواوی وڵاتانی یەکێتیی ئەوروپا دەنێرن، هەنگوینەکە هەروەها گەیشتووەتە وڵاتانی عەرەبی، ئاسیا، ئەمریکا و کەنەدا. هاوکات، کارگەی کۆمپانیاکە لە ناوچەی پیشەسازیی سێواسە و دوای پشکنینی ورد و دڵنیابوونەوە لە کوالێتییەکەی، هەنگوینەکە لە پاکەت دەنرێت و ڕەوانەی بازاڕەکان دەکرێت.

باکگراوند: کۆمپانیا کوردیەکەی باکووری کوردستان، لە ساڵی 1995ـەوە دامەزراوە، ساڵانە نزیکەی چوار هەزار تۆن هەنگوین بە بازاڕەکانی دەرەوە دەفرۆشێت.