تەیف سامی واژۆی لەسەر نووسراوی خەرجکردنی مووچەی مانگی یەک کرد

ئاڤا نیوز

بەرپرسی نووسینگەی ئاڤا لە بەغدا دەڵێت: سەرجەم ڕێکارەکانی خەرجکردنی مووچەی مانگی یەکی مووچەخۆرانی هەرێمی کوردستان، لە وەزارەتی دارایی عێراق تەواو بوون؛ لەدوایین ڕێکاری خەرجکردنیەتی ئەگەر ئەمڕۆ تەواو نەبێت سبەی پارەکە دەخرێتە سەر هەژماری بانکی وەزارەتی دارایی هەرێمی کوردستان.

زانیاریی پەیامنێر: دەروون مەلا ناجی، بەرپرسی نووسینگەی ئاڤا لە بەغدا ڕایگەیاند: دوای تەواوکردنی ڕێکارەکانی لیستی مووچە، تەیف سامی، وەزیری دارایی عێراق واژۆی خەرجکردنی مووچەی مووچەخۆرانی کوردستانی کرد، نووسراوەکە چووەتە بەشی (المدفوعات) لەوێ پێش تەواوبوونی دەوامی فەرمی نووسراو بۆ یەکتر دەنێرن، ئەگەر پارەی پێویست لەبەر دەست بێت پارەکە دەخرێتە سەر هەژماری بانکی وەزارەتی دارایی و ئابووری هەرێمی کوردستان."

لەلایەکی دیکەوە: سەرچاوەیەک لە لقی هەولێری بانکی ناوەندی عێراق بە ئاڤای گوت، "تاوەکو ئێستا هیچ ئاگاداکردنەوەیەکمان بۆ نەهاتووە سەبارەت بە خەرجکردنی مووچەی مانگی یەکی مووچەخۆرانی هەرێمی کوردستان."

ئەوەی پێویستە بیزانیت: وەزارەتی دارایی هەرێمی کوردستان هەموو ئامادەکارییەکی کردووە، لەگەڵ گەیشتنی پارەکە خشتەی دابەشکردنی مووچە بڵاودەکرێتەوە و لەماوەی سێ ڕۆژدا مووچە دابەش دەکەن، هاوکات نزیکەی 700 هەزار مووچەخۆر لەڕێگەی هەژماری من مووچەی مانگی یەک وەردەگرن.