ژاپۆن دەست بەسەر بەلەمێکی ڕاوەماسیی چیندا دەگرێت

ئاڤا نیوز

دەسەڵاتدارانی ژاپۆن ڕایانگەیاند کە بەلەمێکی ڕاوەماسیی چینییان دەستبەسەر کردووە و کاپتنەکەیان دەستگیر کردووە. ئەم ڕووداوە لە کاتێکدایە کە پەیوەندییەکانی نێوان ئەم دوو وڵاتە زلهێزەی ئاسیا لەوپەڕی ئاڵۆزیدان.

ڕاگەیێنراوی فەرمی: بەپێی ڕاگەیەندراوی ئاژانسی ماسیگریی ژاپۆن، ڕووداوەکە لە ناوچەی ئابووریی تایبەتی ژاپۆن، لە دووری 166 کیلۆمەتر لە باشووری ڕۆژئاوای دوورگەی "مێشیما" ڕوویداوە.

زانیاریی زیاتر: چیرۆکەکە بەو شێوەیە بووە کە داوا لە کاپتنی بەلەمەکە کراوە بۆ پشکنین بوەستێت، بەڵام فەرمانەکەی جێبەجێ نەکردووە و هەڵاتووە، هەر بۆیە دەستبەجێ دەستگیر کراوە.

ئەمەش بزانە: جگە لە کاپتنی بەلەمەکە، 10 کەسی دیکەش لەناو بەلەمەکەدا بوون کە تا ئێستا چارەنووسیان نادیارە.

باکگراوند: ئەمە یەکەمجارە لە ساڵی 2022ـەوە کە ژاپۆن بەلەمێکی چینی لەو ناوچەیەدا دەستبەسەر بکات.