نرخی مریشک هەرزان دەبێت

ئاڤا نیوز 

 

دوای ئەوەی بۆ ماوەی نزیکەی مانگێک نرخی مریشک لە بەرزبوونەوە بوو، ئێستا چەند ڕۆژێکە نرخی دابەزیوە و بەرپرسێکی کێڵگە پەلەوەرییەکان هۆکارەکەی بۆ ئاڤا نیوز ئاشکرا دەکات.

 

وێنە گەورەکە: هەرێمی کوردستان لە دابینکردنی گۆشتی مریشک توانای دابینکردنی بازاڕی ناوخۆیی هەیە و بەردەوام بۆ شارەکانی ناوەڕاست و خوارووی عێراق هەناردەی دەکات.

 

لێدوانی فەرمی: عەلی تاهیر، جێگری سەرۆکی دەستەی باڵای پیشەسازیی پەلەوەر لە هەرێمی کوردستان بە ئاڤا نیوزی ڕاگەیاند: هۆکاری هەرزانبوونی نرخی مریشک بۆ زیادبوونی ڕێژەی هاوردەی مریشکی بەستوو لە تورکیاوە دەگەڕێتەوە، هاوکات شارەکانی خوارووی عێراق بەرهەمیان زۆر بووە و لە بازاڕ خواستی لەسەر کەمبووەتەوە.

 

ئەوەی پێویستە بیزانیت: ئەمڕۆ لە شاری هەولێر نرخی یەک کیلۆ مریشکی زیندوو سێ هەزار و 350 دینار بووە، بەراورد بە دوێنێ 150 دینار دابەزیوە، لە سلێمانیش ئەمڕۆ نرخی هەر کیلۆیەک سێ هەزار و 200 دینارە بووە بەراورد بە دوێنێ 100 دینار دابەزیوە.

 

باکگراوند: لە سنووری پارێزگای هەولێر 592 پڕۆژەی پەلەوەری بۆ بەرهەمهێنانی مریشکی زیندوو هەیە، ساڵانە 52 هەزار و 822 تۆن گۆشتی مریشک بەرهەم دەهێنن.