هاوکارییەکانی بارزانی خێرخوازی دەگاتە 58 هەزار ئاوارەی ڕۆژئاوای کوردستان

ئاڤا نیوز

دەزگای خێرخوازیی بارزانی لەرێگەی 12 تیمی مەیدانییەوە، هاوکاریی گەیاندە پتر لە 9 هەزار خێزانی ئاوارە لە شار و شارۆچکە جیاوازەکانی ڕۆژئاوای کوردستان.

لێدوانی فەرمی: مووسا ئەحمەد، سەرۆکی دەزگای خێرخوازیی بارزانی لە کۆنفرانسێکی ڕۆژنامەوانییدا ڕایگەیاند: "تیمەکانمان لە قامیشلۆ، دێرک، عاموودا، گرکێلەگێ و چەندین ناوچەی دیکە سەرقاڵی دابەشکردنی کۆمەکن؛ ئەو بۆکسانەی پێشکەشی ئاوارەکان دەکرێن، هەموو جۆرە خۆراکێکیان تێدایە و بۆ ماوەی 2 هەفتە بەشی پێداویستیی هەر خێزانێک دەکات."

زانیاریی زیاتر: ئەم هەڵمەتە فراوانە کە ماوەی هەفتەیەکە دەستیپێکردووە، لەرێگەی 150 کارمەند و 165 بارهەڵگری گەورەوە ئەنجامدراوە، کە تێیدا 9,180 خێزان (واتا 57,955 کەس) سوودمەندی ڕاستەوخۆ بوونە.

٠ تیمەکان توانیویانە لە 82 قوتابخانەدا هاوکارییەکان دابەش بکەن کە بریتیین لە سەبەتەی خۆراک، دۆشەک، بەتانیی و پێداویستیی تەندروستیی. هاوكات بۆ بەرەنگاربوونەوەی سەرما، لە 108 قوتابخانە و 8 مزگەوتدا گازی وایل وەک سووتەمەنیی دابەش کراوە و ڕۆژانە 9,330 ژەمە خواردنی گەرم بۆ ئاوارەکان ئامادە دەکرێت.

٠ لە ڕووی تەندروستییشەوە، تیمە پزیشکییەکان سەردانی 38 قوتابخانەیان کردووە و چارەسەری پێویستیان بۆ 2,749 کەس دابین کردووە، جیا لەمانەش دەزگاکە توانیویەتی دەرفەتی کار بۆ 289 کەس لەناو ناوچەکەدا بڕەخسێنێت تاوەکو یارمەتیدەری پڕۆسەی دابەشکردنەکە بن.

ئەوەی پێویستە بیزانیت: ڕۆژئاوای کوردستان بەهۆی هێرشەکانی سوپای سووریا و گرووپە چەکدارەکان لە سەرەتای ساڵی 2026ـەوە، ڕووبەڕووی شەپۆلێکی گەورەی ئاوارەبوون بووەتەوە. شارەکانی وەک قامیشلۆ و حەسەکە ئێستا بوونەتە پەناگەی دەیان هەزار کەس کە پێویستییان بە هاوکاریی بەپەلەی مرۆیی هەیە بۆ ڕزگاربوون لە برسێتیی و سەرما، هەر بۆیە هەرێمی کوردستان لەرێگەی دەزگای خێرخوازیی بارزانییەوە ڕاستەوخۆ دەستوەردانی کرد بۆ سووککردنی ئەو بارگرانییە.