نووسینگەی ڕاگەیاندنی پەرلەمانی عێراق: پارتی و یەکێتیی داوای دواخستنی دانیشتنی ئەمرۆیان کردووە

ئاڤا نیوز

نووسینگەی سەرۆکی پەرلەمانی عێراق بڵاویکردەوە، هەیبەت حەلبووسی، سەرۆکی پەرلەمان، داواکارییەکی پارتی و یەکێتی بەدەست گەیشت بۆ دواخستنی کۆبوونەوەی پەرلەمان بۆ هەڵبژاردنی سەرۆککۆمار. 

ڕاگەیێنرای فەرمی: نووسینگەی ڕاگەیاندنی سەرۆکی پەرلەمانی عێراق ڕایگەیاند: هەیبەت حەلبووسی داواکاریی پارتی دیموکراتی کوردستان و یەکێتیی نیشتمانیی کوردستانی بۆ دواخستنی دانیشتنی ئەمڕۆی هەڵبژاردنی سەرۆککۆمار وەرگرت، بە مەبەستی پێدانی دەرفەتی زیاتر بۆ لێکتێگەیشتن و ڕێککەوتن لەنێوان هەردوو حیزبەکەدا.

زانیاریی زیاتر: دانیشتنەکە بڕیاربوو کاتژمێر 11:00ـی پێشنیوەڕۆی ئەمڕۆ سێشەممە ئەنجام بدرێت، بەڵام ناکۆکییەکان لەسەر ناوی کاندیدەکان وادەی دانیشتنەکەی گۆڕیوە و تەنها زەنگی چوونە ژوورەوە لێدراوە.

لێدوانە فەرمییەکان: ئاڤێستا مام یەحیا، پەرلەمانتاری پارتی لە پەرلەمانی عێراق ڕایگەیاند: یەکێتی نیشتمانیی کوردستان داوای لە پارتی دیموکراتی کوردستان کردووە مۆڵەتێکی زیاتریان پێ بدرێت، پارتیش لەسەر ئەوە سوورە ناوماڵی کورد هەمیشە یەکڕیز بێت، بەڵام لەسەرەتاوە ئەوان هەڵوێستێکی جددیان نەبوو بۆیە کاندیدی خۆمان هەیە بۆ پۆستی سەرۆککۆمار. 

هاوکات ئەحمەد حاجی ڕەشید، پەرلەمانتاری کۆمەڵ بە ئاڤا میدیای ڕاگەیاند: ڕۆژی ڕابردوو کاندیدی یەکێتی سەردانی ئێمەی کردووە و داوای ئەوەمان کردووە کاندیدێکی هاوبەش پێشنیاز بکرێت. 

دیلان عەفوور، گوتەبێژی فراکسیۆنی یەکێتی لە پەرلەمانی عێراق بە ئاڤای ڕاگەیاند: داواکارییەکی فەرمییمان بۆ دواخستنی دانیشتنی ئەمڕۆی پەرلەمان ئاڕاستەی هەیبەت حەلبووسی کردووە، تاوەکو دەرفەت بدرێت بۆ لێکتێگەیشتنی زیاتر. ئێستا کۆدەنگییەک هەیە بۆ ئەوەی دانیشتنەکە بۆ هەفتەی داهاتوو دوابخرێت، دواخستنی پێشلکاری دەستووریش بێت لە عێراقدا ڕێگە پێدراوە چونکە لێکتێگەیشتن و ڕێککەوتنی سیاسی پێویستە.