سیپان شێروانی: دانیشتنی پەرلەمان بۆ هەڵبژاردنی سەرۆککۆمار دوادەخرێت

ئاڤا نیوز

دانیشتنی پەرلەمانی عێراق بۆ هەڵبژاردنی سەرۆککۆمار دوادەخرێت و پەرلەمانتارێکی پارتی دەڵێت: ڕێژەی یاسایی (نیساب) تەواو نابێت.

چیرۆکی سەرەکی: لە 29ی مانگی ڕابردوودا پەرلەمانتارانی عێراق سوێندی یاساییان خوارد، دواتر سەرۆکی پەرلەمان هەڵبژێردرا. بەپێی دەستوور دەبوو لە ماوەی 30 ڕۆژدا سەرۆککۆماری عێراق هەڵبژێردرێت، ئەمڕۆ وادەکە تەواو دەبێت و بڕیارە کاتژمێر 11ی پێشنیوەڕۆ، دانیشتنی پەرلەمان بۆ ئەو پرسە دەست پێ بکات.

لێدوانی فەرمی: سیپان شێروانی، ئەندامی پەرلەمانی عێراق لە فراکسیۆنی پارتی بە ئاڤای ڕاگەیاند: بەهۆی تەواونەبوونی ڕێژەی یاسایی، دانیشتنی پەرلەمان دوادەخرێت و هەڵبژاردنی سەرۆککۆماری عێراق دەچێتە ڕۆژێکی دیکە. پارتی، یەکێتی و لایەنەکانی دیکە بە چەند کاندیدێک چوونەتە نێو پرۆسەی هەڵبژاردنی سەرۆککۆمارەوە؛ لە قۆناغی ئێستای عێراقدا بە پێویستی دەزانین پۆستی سەرۆککۆمار لای پارتی بێت، گفتوگۆشمان لەگەڵ سەرجەم لایەنەکان کردووە و فوئاد حوسێن کاندیدی ئێمەیە.

زانیاریی زیاتر: بە گوتەی سیپان شێروانی، بەردەوام گفتوگۆ لە نێوان پارتی و یەکێتیدا هەبووە؛ لەو چەند ڕۆژەشی کە ماوە بۆ هەڵبژاردنی سەرۆککۆمار، دەرفەتێکی دیکەیە بۆ پارتی و یەکێتی تاوەکو لەسەر کاندیدێک بۆ سەرۆککۆمار ڕێک بکەون. جگە لەو پۆستە، کورد لە عێراقدا چەندین پۆستی دیکەی وەک جێگری سەرۆکوەزیران، وەزیری دەرەوە و سێ وەزارەتی دیکەی بەدەستەوەن و دەکرێت لە نێوان پارتی و یەکێتیدا دابەش بکرێن.