قۆناغی یەکەمی پرۆسەی سەرژمێری لە هەرێمی کوردستان دەستپێدەکات

ئاڤا نیوز

دەستەی ئاماری هەرێمی کوردستان خولی ڕاهێنانی کارمەندانی بۆ سەرژمێری گشتی تەواو کردووە، قۆناغی یەکەمی پرۆسەکە دەستپێدەکات و زیاتر لە مانگێک دەخایەنێت.

وێنە گەورەکە: کەمتر لە دوو مانگ ماوە بۆ وادەی دیاریکراوی پرۆسەی سەرژمێری گشتی لە هەرێمی کوردستان و عێراق کە بڕیارە 20-11ی ئەمساڵ بکرێت، زیاتر 30 هەزار کەس ڕاهێنراون و لەو ژمارەیە حەوت هەزاریان بۆ پاێزگاکانی هەرێمی کوردستانن، لە قۆناغی یەکەمدا ژمارە بۆ کۆی خانوو، بینا و  باڵەخانەکان دادەنرێت.

لێدوانی فەرمی: گوهدار محەممەد، بەڕێوەبەری کەرتی تەکنیکی و مەیدانی سەرژمێری لە هەرێمی کوردستان بە ئاڤا نیوزی گوت: "لەماوەی سێ ڕۆژی داهاتوودا قۆناغی یەکەمی سەرژمێری گەمارۆ و هەژماردن دەستپێدەکات، کە بەهۆی چەند گرفتێکی هونەرییەوە چەند ڕۆژێک لە وادەی دیاریکراو دواکەوتووە."

بۆچی گرنگە: زانینی ژمارەی دانیشتووان بەدروستی کاریگەری لەسەر پشکی هەرێمی کوردستان لە بودجەی عێراق، بەهای کورسی لە پارێزگاکان و چەند پرسێکی دیکە دەبێت.

باکگراوند: 27 ساڵە سەرژمێری دانیشتووان لە عێراق نەکراوە، لە دوایین سەرژمێریشدا هەرێمی کوردستان بەشدار نەبووە، لەڕێگەی سەرژمێرییەوە بەوردی ژمارەی دانیشتووان و ئاستی بژێوییان دیاری دەکرێت، جگە لەوە ژمارەی باڵەخانە و خانوو دەزانرێت.