دوو لایەنی ئیسلامی بۆ هەڵبژاردنی پەرلەمانی کوردستان یەکیان گرت

ئاڤا نیوز

 

کۆمەڵی دادگەریی و بزووتنەوەی پەیوەندیی ئیسلامی لە بازنەی هەڵەبجە یەکیان گرت و سێ بەربژێری بزووتنەوەی پەیوەندیی ئیسلامی لەو بازنەیە کشانەوە.

 

وێنە گەورەکە: بزووتنەوەی پەیوەندیی ئیسلامی کە تەمەنی شەش مانگە و مانگی سێی ئەمساڵ کۆنگرەی یەکەمی خۆی بەست، لەو بازنەیەی کە زۆرترین پشتیوانی هەیە، بەربژێرەکانی کشاندووەتەوە و دەنگ بە بەربژێرانی کۆمەڵی دادگەریی کوردستان دەدەن.

 

لێدوانی فەرمی: گۆران نووری، ئەندامی مەکتەبی سیاسیی بزووتنەوەی پەیوەندیی ئیسلامی بە ئاڤا نیوزی ڕاگەیاند، "بۆ ئەوەی کورسی دووەمی پارێزگاکە بێت، بڕیارماندا بەربژێرەکانمان لە بازنەی هەڵەبجە بکشێنینەوە، دەنگ بەو پێنج بەربژێرە دەدەین کە کۆمەڵی دادگەریی لە بازنەکە دا هەیەتی."

 

بۆچوونی لایەنی بەرامبەر: بێستوون حەمە ساڵح، بەرپرسی مەكتەبی هەڵبژاردنی دادگەریی كوردستان بە ئاڤا نیوزی ڕاگەیاند، "لێکتێگەیشتنمان لەگەڵ بزووتنەوەی پەیوەندیی ئیسلامی دا هەیە، بۆ ئەوەی پەیوەندیی و هەماهەنگیمان لەسەرجەم بازنەکانی دیکەیش فراوان بکەین."

 

زانیاریی زیاتر: بزووتنەوەی پەیوەندیی ئیسلامی لە سنووری پارێزگای هەڵەبجە خاوەنی دوو هەزار دەنگدەرە.