ئێران لەبارەی بەکارهێنانی ئاسمانی عێراق لە لایەن ئیسرائیلەوە هۆشداری بە ئەمریکا دەدات

ئاڤا نیوز

 

سوپای ئێران، بەکارهێنانی ئاسمانی عێراق لە لایەن ئیسرائیلەوە بۆ هێرشکردنە سەر وڵاتەکەی دوپات دەکاتەوە و هۆشداریی دەداتە ئەمریکاش کە ڕێگریی لە ئیسرائیل بکات.

 

وێنە گەورەکە: بەرەبەیانی ڕۆژی شەممە، ئیسرائیل بە دوو قۆناغ هێرشی ئاسمانیی کردە سەر چەند بنکەیەکی سەربازیی ئێران لە پارێزگاکانی تاران و ئیلام و خۆزستان و لە بەشێکی هێرشەکە ئاسمانی عێراق بەکار هێناوە.

 

ڕاگەیێنراوی فەرمی: ناوەندی پەیوەندییەکانی ئەرکانی گشتیی هێزە چەکدارەکانی ئێران ڕایگەیاند: "گەلی بەشەرەف و بوێری ئێران ئاگادار دەکەینەوە، فڕۆکە دوژمنکارەکانی زایۆنیستی لە دەستدرێژییەکی ڕووون و بە پێشێلکردنی یاسا نێودەوڵەتییەکان لە ئاسمانی بەردەستی سوپای تیرۆریستی ئەمریکا لە عێراق کەڵکی وەرگرتووە، بە هەڵدانی چەند مووشەکێکی دوور مەودا کە لە ئاسمانەوە لە سەد کیلۆمەتر دوور لە سنووری ئێرانەوە هەڵدراون". 

 

سوپای ئێران ئەوەشی ڕاگەیاندووە کە سیستەمی بەرگریی ئێران ژمارەیەکی زۆری مووشەکی خستووەتە خوارەوە و ڕێگریی لە فڕۆکەکانی ئیسرائیل کردووە بێنە نێو ئاسمانی وڵات. هاوکات هۆشداریش دەداتە ئەمریکا ڕێگریی بکات لە هێرشەکانی ئیسرائیل بۆ سەر ئێران.

 

ئەوەی پێویستە بیزانیت: ئێران جەخت لەوە دەکاتەوە، وێڕای پاراستنی مافی وەڵامدانەوەی یاسایی و ڕەوای خۆی لە کاتی خۆیدا، بە پێویستی دەزانێت ئاگربەستی هەمیشەیی بکرێت بۆ ڕێگریکردن لە کوشتنی خەڵکی بێتاوان و  ستەملێکراو لە غەززە و لوبنان.