ئەنجامی کۆتایی هەڵبژاردنی پەرلەمانی کوردستان ڕادەگەیێنرێت

ئاڤا نیوز 

 

کۆمیسیۆنی باڵای هەڵبژاردنەکانی عێراق ئامادەکاریی بۆ ڕاگەیاندنی ئەنجامی کۆتایی هەڵبژاردنی خولی شەشەمی پەرلەمانی کوردستان دەکات و چاوەڕواندەکرێت سبەی ئەنجامی کۆتایی ڕابگەیەنرێت.

 

وێنە گەورەکە: نۆ ڕۆژ بەسەر پڕۆسەی دەنگدانی گشتیی تێدەپەڕێت، دوای ڕاگەیاندنی ئەنجامی 99.63%ـی دەنگە جیاكراوەكان وەک ئەنجامی بەرایی، ئەمڕۆ سێشەممە لیژنەیەکی کۆمیسیۆنی هەڵبژاردنەکان هاتووەتە شاری هەولێر بەمەبەستی یەکلاییکردنەوەی سکاڵا تۆمارکراوەکان کە ژمارەیان 198 سکاڵایە، ئەمەش وەک هەنگاوی یەکەم سەیر دەکرێت بۆ ڕاگەیاندنی ئەنجامی کۆتایی.

 

زانیاریی تایبەت: سەرچاوەیەک لە کۆمیسیۆنی هەڵبژاردنەکانی عێراق بە ئاڤا نیوزی ڕاگەیاند؛ "سبەی چوارشەممە کۆمیسیۆن ئەنجامی کۆتایی ڕادەگەیێنێت و ناوی کاندیدە دەرچووەکانی ئاشکرا دەکرێن و دوای ڕاگەیاندنی ئەنجامی کۆتایی، سێ ڕۆژ دەرفەت لەبەردەم لایەنەکان هەیە بۆ ئەوەی تانە لەئەنجامەکان بدەن."

 

زانیاریی زیاتر: بە گوتەی ئەو سەرچاوەیە تەنیا لە یەک حاڵەتدا ڕاگەیاندنی ئەنجامەکان دەکەوێتە ڕۆژی پێنجشەممە، ئەویش پەیوەندی یەکلایی نەبووەنەوەی تەواوی سکاڵاکانەوە هەیە.

 

ئەوەی پێویستە بیزانیت: لە هەڵبژاردنی خولی شەشەمی پەرلەمانی کوردستان کە بەسەر چوار بازنەدا دابەشکرابوو، لە کۆی دوو ملیۆن و 899 هەزار و 578 کەس، دوو ملیۆن 87 هەزار و 972 کەس لەو پڕۆسەیە دەنگیدا.