دەبێت پەرلەمان لە ماوەی مانگێکدا یەکەم دانیشتنی بکات

ئاڤا نیوز

کۆمیسیۆن ئەنجامی کۆتایی هەڵبژاردنی ڕاگەیاند، دوای پەسەندکردنی ئەنجامەکان و یەکلاکردنەوەی تانەکان، چەند ڕۆژێک لەبەردەم لایەنەکانە بۆ ئەوەی بەسەرۆکایەتی بەتەمەنترین پەرلەمانتار دانیشتنی پەرلەمان بکەن.

وێنە گەورەکە: لایەنە بەشداربووەکانی خولی شەشەمی پەرلەمانی کوردستان سێ ڕۆژیان لەبەردەمە بۆ ئەوەی تانە لە ئەنجامەکان بدەن، دوای یەکلاکردنەوەی تانەکان لەلایەن دەستەی دادوەری لە ماوەی 10 ڕۆژدا، سەرۆکایەتیی هەرێمی کوردستان لە ماوەی 10 ڕۆژدا ناوەکان پەسەند دەکات و داوا لە پەرلەمانتارە دەرچووەکان دەکات سوێندی یاسایی بخۆن.

لێدوانی فەرمی: خالید عەباس، بەرپرسی لقی دهۆکی کۆمیسیۆنی باڵای سەربەخۆی هەڵبژاردنەکانی عێراق بە ئاڤا نیوزی گوت: "دەبێت دەستەی دادوەری لە ماوەی 10 ڕۆژدا تانەکان یەکلایی بکاتەوە، ئینجا ناوە پەسەندکراوەکان بۆ سەرۆکایەتیی هەرێمی کوردستان دەنێرێت، لە ماوەی 10 ڕۆژدا پەسەند دەکرێن و سەرۆکی هەرێمی کوردستان داوا دەکات لە 10 ڕۆژ پەرلەمانتارەکان سوێندی یاسایی بخۆن و یەکەم دانیشتن بکرێت."

ئەوەی پێویستە بیزانیت: لە یەکەم دانیشتنی پەرلەماندا، سەرەتا بەتەمەنترین پەرلەمانتار کە محەممەد سلێمان، سەرۆکی لیستی نەوەی نوێیە لە بازنەی سلێمانی؛ سوێندی یاسایی دەخوات ئینجا ئەندامەکانی دیکە، ئەگەر ڕێککەوتنی لایەنەکان هەبوو دەستەی سەرۆکایەتیی هەڵدەبژێرێت، ئەگەرنا دانیشتن بەکراوەیی دەهێڵرێتەوە.