شیعەکان دەیانەوێت مەحموود مەشهەدانی لە جێگەی محەممەد حەلبووسی سەرۆکی دەرکراو دابنێن

ئاڤا نیوز

 

دوای پێنج مانگ و 12 ڕۆژ جارێکی دیکە پەرلەمان لەسەر پرسی هەڵبژاردنی سەرۆکێک بۆ پەرلەمان کۆدەبێتەوە، سیناریۆکانی هەڵبژاردنی سەرۆکێک بۆ پەرلەمان بە کراوەیی ماونەتەوە و هێشتا سەرکردە سیاسییە سوننەکان نەگەیشتوونەتە ڕێککەوتن.

 

ڕاگەیێنراوی فەرمی: سەرۆکایەتیی پەرلەمانی عێراق کارنامەی کۆبوونەوەی ڕۆژی پێنجشەممەی بڵاوکردەوە و تەنیا بڕگەیەک لەخۆدەگرێت، ئەویش بریتییە لە هەڵبژاردنی سەرۆکی نوێی پەرلەمان.

 

زانیاریی بەدەستهاتوو: دەروون مەلا ناجی، پەیامنێری ئاڤا لە بەغداوە لەبارەی سیناریۆکانی دانیشتنەکەی ڕۆژی پێنجشەممە ڕایگەیاند: لە ڕووی یاساییەوە پێویستە 220 ئەندام پەرلەمان ئامادەی دانیشتنەکە ببن، لە ماوەی ڕابردوودا بۆ زۆربەی دانیشتنەکانی پەرلەمان ژمارەی بەشداربووان لەنێوان 170 بۆ 190 ئەندام بووە، تەنیا دانیشتنەکەی ڕۆژی سێشەممە نەبێت 208 پەرلەمان ئامادەی دانیشتنەکە بوون.

 

زانیاریی زیاتر: چوار کاندیدەکەی پۆستی سەرۆکی پەرلەمان مەحموود مەشهەدانی، سالم عیساوی، تەڵاڵ زەوبەعی و عامر عەبدولجەبار هەریەک لەمانە پێویستە 166+1 دەنگ بەدەست بهێنن بۆ ئەوەی ببن بە سەرۆکی ئەنجوومەنی نوێنەران.

 

ئەوەی پێشبینی دەکرێت: سیناریۆکان لەبەردەم محەممەد حەلبووسی و پارتەکەی کراوەن؛ حەلبووسی مەرجی بۆ لایەنە شیعییەکان هەیە ئەویش پشتیووانیکردنە لە مەحموود مەشهەدانی بۆ پۆستی سەرۆکی پەرلەمان و کاندیدەکانی دیکەش پاشەکشە بکەن، بەڵام بەربەستی گەورەی بەردەم ئەم سیناریۆیە سالم عیساوییە کە کاندیدی پارتەکەی خەمیس خەنجەرە  و کە تاوەکو ئێستا ئامادە نییە خەمیس خەنجەر پاشەکشەی پێبکات.

 

ئەمەش بزانە: پۆستی سەرۆکی پەرلەمان پشکی سوننەکانە، بەڵام ئەو پێکهاتەیە لەناوخۆیاندا لەسەر کاندیدێک بۆ ئەو پۆستە ڕێکنەکەوتوون، پارتی تەقەدووم و بەشێکی بەرچاوی چوارچێوەی هەماهەنگی پشتیوانی مەحموود مەشهەدانی دەکەن، سالم عیساویش کاندیدی بەشێک لە لایەنە سوننەکانە و کار بۆ سەرخستنی دەکەن.