هێزە سەربەخۆ شیعییەکان باسم بەدری بۆ پۆستی سەرۆکوەزیران ڕەت دەکەنەوە

ئاڤا نیوز

هێزە سیاسییە سەربەخۆ شیعییەکان، کاندیدکردنی باسم بەدری بۆ پۆستی سەرۆکوەزیرانی عێراق ڕەت دەکەنەوە و ڕایدەگەیێنن "بژاردەیەکی خراپ و ناڕاستگۆیانەیە بۆ دەنگدەرانی شیعە کە دەنگیان بە حیزبەکانی چوارچێوەی هەماهەنگی داوە."

 

وێنە گەورەکە: باسم بەدری، سەرۆکی دەستەی لێپرسینەوە و دادوەری و یەکێک لە سەرکردەکانی حیزبی دەعوەیە بە سەرۆکایەتی نووری مالیکی، ئێستا باس لە کاندیدبوونی دەکرێت بۆ پۆستی سەرۆکوەزیرانی عێراق، بەڵام تاوەکوو ئێستا هێزەکانی چوارچێوەی هەماهەنگی لەسەر ناوێک نەگەیشتوونەتە ڕێککەوتنی کۆتایی.

 

ڕاگەیێنراوی فەرمی: لە ڕاگەیێنراوێکی هێزە سیاسییە سەربەخۆ شیعییەکاندا هاتووە، چوارچێوەی هەماهەنگی کەسایەتییەکی لە ڕووی سیاسییەوە نەناسراو و گومانلێکراو کاندید کردووە، "باسم بەدری، بە پەیوەندییەکانی بە دەزگا هەواڵگرییە بیانییەکان و لەگەڵ هێزەکانی گەندەڵی ناسراوە، لە ژینگەیەکی پڕ لە پرسیاری گەورەدا، بژاردەیەکی خراپ و ناڕاستگۆیانەیە بۆ دەنگدەرانی شیعە کە دەنگیان بە حیزبەکانی چوارچێوەی هەماهەنگی داوە."

 

زانیاریی زیاتر: هێزە سەربەخۆکان داوا لە هێزەکانی نێو چوارچێوەی هەماهەنگی دەکەن "کەسایەتییەکی نیشتمانی، پاک و لێهاتوو کاندید بکەن کە پێداویستییەکانی قۆناغەکە دابین بکات، نەک کەسێکی بێهێز و نەناسراو کە گومانی لەسەرە." دەشڵێن: "ئێمە وەک هێزە سیاسییە سەربەخۆ شیعییەکان، دژایەتیی خۆمان بۆ ئەم بژاردەیە ڕادەگەیێنین و گەلی عێراق دەخەینە بەردەم بەرپرسیارێتیی نیشتمانیی خۆیان بۆ ڕەتکردنەوەی ئەم هەڵبژاردنە."