ئاڤا هۆکارە سەرەکییەکانی نەخۆشکەوتنی خەڵکی شارەزوور ئاشکرا دەکات

ئاڤا نیوز

 

ئاڤا بەدواداچوونی ورد بۆ هۆكاری بڵاوبوونەوەی نەخۆشیی سكچوون و ڕشانەوە لە سنووری قەزای شارەزوو دەكات و هۆكارە سەرەكییەكان ئاشكرا دەكات، یەكێك لە هۆكارە سەرەكییەكان گەندەڵیی بەرپرسێكە.

 

وێنە گەورەكە: هەفتەی ڕابردوو، لە پڕێكدا سەدان كەس كە زۆرینەیان منداڵ بوون بەهۆی تووشبوونیان بە نەخۆشیی سكچوون و ڕشانەوە گەیێنرانە نەخۆشخانەی شەهید ڕەئوف بەگ لە شارەزوور، لە چەند ڕۆژێكدا ژمارەكە گەیشتە دوو هەزار نەخۆش.

 

زانیاریی بەدەستهاتوو: كاروان ڕەحمان، پێشكەشكاری بەرنامەی زەڕەبینی ئاڤا میدیا چووەتە قەزای شارەزوور و بەدواداچوونی وردی بۆ هۆكارە سەرەكییەكانی بڵاوبوونەوەی نەخۆشییەکە كردووە، دەركەوتووە كە دوو هۆكاری سەرەكیی هەن.

 

هۆکارە زانراوەکان: هۆكاری یەكەم، دەگەڕێتەوە بۆ ساڵی 2006 و پرسێكی پەیوەست بە گەندەڵی، کاتێک کۆمپانیایەک بە هاوکاریی بەرپرسێکی باڵای یەکێتی تەندەری چاککردنەوەی پڕۆژەی ئاو و ئاوەڕۆی شارەزووری بۆ دەرچووە، بۆریی ئاوی خواردنەوە و ئاوەڕۆی زۆرینەی كۆڵانەكانی قەزاكە یەك جۆرن كە ئەمەش لە ڕووی ئەندازیارییەوە ڕەتكراوەیە.

 

لەلایەكی دیكەوە: بەپێی بەدواداچوونی ئاڤا، ساڵی 2013 بەهەمان شێوە هەشتا کەس بەهۆی تێکەڵبوونی ئاوی خواردنەوە و زێراب نەخۆش کەوتن، بەڵام ڕێژەکە کەمبوو و هەر ئەوکات پەردەپۆش کرا.

 

هۆكاری دووەمی بڵاوبوونەوەی نەخۆشییەکە، بریتییە لە ئەوەی كە بۆڕییەكانی ئاو و ئاوەڕۆ لەژێر زەوی لەیەك ئاڵاون و بە هەڕەمەكی دانراون و تێكەڵبوونە ئەمەش بووەتە هۆی دروستبوونی پاڵەپەستۆ لەسەر بۆرییەكان و شكاون، دانیشتووانی دەڤەرەكە لە هاوینەوە هەستیان بە بۆنی ناخۆش كردووە، بەڵام هۆكارەكەیان نەزانیوە، تا لە لافاوی چەند ڕۆژی ڕابردوو ئاوی ئاوەڕۆ پەنگی خواردووەتەوە و بە تەواوی تێكەڵ بە ئاوی خواردنەوە بووە.

 

ئەوەش بزانە: دوای بەدواداچوون، وەزارەتی تەندروستی بە فەرمی ڕایگەیاند: هۆكاری بڵاوبوونەوەی نەخۆشییەكە پیسبوونی ئاوی خواردنەوەی ماڵانە لە قەزای شارەزوور و هەر زوو ڕێنوێنیی خەڵك كرا بەهیچ شێوەیەك ئاوی ماڵەكانیان نەخۆنەوە.