ئاڤای خەڵک؛ داوا دەکرێت ڕێگای کۆیە - تەقتەق خێرا تەواو بکرێت

ئاڤا نیوز

ژمارەیەک هاووڵاتی لە تەقتەقەوە داوا دەکەن پڕۆژەی چاککردن و نۆژەنکردنەوەی ڕێگای کۆیە - تەقتەق خێراتر بکرێت.

بەدواداچوونی ئاڤا: ژمارەیەک هاووڵاتیی پەیوەندییان بە ئاڤاوە کردووە دەڵێن ماوەی حەوت مانگ بۆ تەواوکردنی ڕێگاکە دانرابوو، بەڵام کارەکان زۆر بە خاوی بەڕێوەدەچن و هەندێک جار تەنیا یەک ئامێر لە ڕێگاکەدا کاردەکات و لەم ماوەیە ئەو ئامێرەشی لێ نەماوە و کارەکان بە تەواوی وەستاون.

لێدوانی فەرمی: کۆسار حەمەساڵح، بەڕێوەبەری چاککردن و پاراستنی ڕێگاوبانی کۆیە لەبارەی داواکاری ئەو هاونیشتمانیانە دەڵێت: ئاگاداركردنەوەمان بە كۆمپانیاكە داوە كە پێویستە ئامێری زیاتر بخاتە کار بۆئەوەی كارەکانی پرۆژەکە خێراتر جێبەجێ بکرێت.

گوژمەی یەک ملیار و 500 ملیۆن دینار بۆ پڕۆژەکە تەرخانکراوە و سێ پڕۆژەی جیاوازە؛-

یەکەمیان کە ئێستا لە جێبەجێکردندایە، نۆژەنکردنەوەی ڕێگای نێوان کۆیە – تەقتەقە بە درێژایی سێ کیلۆمەتر، قیڕە کۆنەکەی هەڵگیراوەتەوە و سەرلەنوێ بە دوو چین قیڕتاو دەکرێتەوە. 

پرۆژەی دووەم قیڕتاوکردنەوەی چینێکی ڕێگای هەیبەت سوڵتان - چنارۆکە بەدرێژایی هەشت کیلۆمەتر، ئەمەش هەر کاتێک ڕێگایەکی بەدیل دەستنیشان بکرێت دەست بە جێبەجێکردنی دەکرێت. 

پرۆژەی سێیەمیش بەشە تێکچوو و چاڵەکانی ڕێگای یەک سایدی نێوان کۆیە – دەربەندە و چاکدەکرێنەوە.