سوودانی داوایەک ئاراستەی عەلی باپیر دەکات

ئاڤا نیوز

محەممەد شیاع سوودانی لە شاری هەولێر سەردانی عەلی باپیری کرد و داوای کرد کۆمەڵی دادگەری چاو بە بڕیاری بایکۆتکردنی پەرلەمانی کوردستاندا بخشێنێتەوە.

چیرۆکی سەرەکی: محەممەد شیاع سوودانی، سەرۆکوەزیرانی عێراق، دوای سێ کۆبوونەوە لەگەڵ مەسرور بارزانی، سەرۆکوەزیرانی هەرێمی کوردستان و نێچیرڤان بارزانی، سەرۆکی هەرێمی کوردستان و سەرۆک مەسعود بازرانی، لە شاری هەولێر سەردانی عەلی باپیر، سەرۆکی کۆمەڵی دادگەریی کوردستانی کرد، بڕیارە سەردانی سەرۆک حیزبەکانی دیکەش بکات.

لێدوانی فەرمی: عەبدولستار مەجید، ئەندامی ئەنجوومەنی باڵای کۆمەڵی دادگەری، دوای کۆبوونەوەکە لە لێدوانێکی ڕۆژنامەوانیدا ڕایگەیاند، سوودانی داوای لە عەلی باپیر کردووە چاو بە بڕیاری بەشدارینەکردن لە پەرلەمانی کوردستان بخشێننەوە و پەشیمان ببنەوە. ئاماژەی بۆ ئەوەش کرد سوودانی داوای لێنەکردوون بەشداری لە پێکهێنانی حکومەتدا بکەن.

باکگراوند: لە هەڵبژاردنی خولی شەشەمی پەرلەمانی کوردستان ژمارەی کورسییەکانی کۆمەڵی دادگەری لە حەوت کورسییەوە بۆ سێ کورسی دابەزی، حیزبەکە ڕایگەیاند لە هەڵبژاردن ساختەکاری لە بەرژەوەندی هەندێک لایەن کراوە، بەم هۆیەوە ڕایگەیاند تەنانەت نەک بەشدارینەکردن لە حکومەت، بەڵکو بەشداری لە پەرلەمانیش ناکەن و بایکۆتی دەکەن.