ڕاگەیێنراوێکی خێرا لە زێرەڤانییەوە لەبارەی هێرشکردنە سەر پێشمەرگەیەکیان لە دووبز

ئاڤا نیوز

فەرماندەیی پێشمەرگەی زێرەڤانی ئیدانەی هێرشکردنە سەر ماڵی پێشمەرگەیەک لە سنووری پارێزگای کەرکووک دەکات، جەختیش لەوە دەکاتەوە کە ڕێوشوێنی توندی یاسایی بەرامبەر بە بکەرەکەی دەگرنەبەر.

 

چیرۆکی سەرەکی: ڕۆژی شەممە 15-11-2025، کاندیدێکی دەرچووی حیزبی تەقەدووم بەناوی موهەیمەن حەمدانی؛ هێرشی کردووەتە سەر ماڵی پێشمەرگەیەک لە قەزای دووبزی سنووری پارێزگای کەرکووک و دەستڕێژی گولـلەی لە ماڵی ئەو پێشمەرگەیە کرد.

 

ڕاگەیێنراوی فەرمی: بەگوێرەی ڕاگەیێنراوی  فەرماندەی پێشمەرگەی زێرەڤانی، ئەو پێشمەرگەیە ناوی ئەحمەد خەڵەفە و ئەو کاتەی هێرشکراوەتە سەرماڵەکەی لە ماڵ نەبووە و کاندیدەکەی تەقەدووم خانەوادەکەیان ئازارداوە. 

 

فەرماندەیی پێشمەرگەی زێرەڤانی، دووپاتی دەکاتەوە کە ئیدانەی "ئەو کارە دەکەن و جەختیش لەوە دەکەنەوە کە هەموو ڕێکارێکی یاسایی لە دژی ئەو کاندیدە دەگرنە بەر و ئیدارە و هێزە ئەمنییەکانی دەڤەرەکەش ئاگادار دەکەنەوە کە پاراستنی گیان و ماڵی هەر پێشمەرگەیەک و خانەوادەکانیان لە سنوورەکە لە ئەستۆی ئەوانە".

 

لەلایەکی دیکەوە: شەوی ڕابردوو حەوت لەو پاسەوانانەی موهەیمەن حەمدانی، کاندیدی دەرچووی حیزبی تەقەدووم لە بازنەی کەرکووک، کە هێرشیان کردە سەر ماڵی ئەو پێشمەرگەیە لە قەزای دووبز، دەستگیرا کران.