بەردی بناغەی بەشی دووەمی وێستگەی پاککردنەوەی ئاوی ئاوەڕۆی هەولێر دادەنرێت

ئاڤا نیوز

بڕیارە ئەمڕۆ یەکشەممە بەردی بناغەی قۆناغی دووەمی وێستگەی پاککردنەوەی ئاوی ئاوەڕۆی هەولێر دابنرێت و لەماوەی دوو ساڵدا لەلایەن کۆمپانیایەکی ناوخۆیی جێبەجێ بکرێت. پڕۆژەکە ئاوی ئاوەڕۆی ماڵان دووبارە پاک دەکاتەوە و بەکاردەهێنرێتەوە بۆ بواری جیاواز.

وێنە گەورەکە: پڕۆژەی وێستگەی پاککردنەوەی ئاوی ئاوەڕۆی ماڵان، یەکێکە لە پڕۆژە ستراتیژییە ژینگەییەکانی ئاستی هەرێمی کوردستان. لەماوەی ڕابردوو لە شاری هەولێر ئاوەڕۆی ماڵان و ئاوی باران یەک ڕێڕەیان هەبوو، بە جێبەجێکردنی ئەم پڕۆژەیە ڕێڕەوەکان جیا دەکرێنەوە و ئاوی ئاوەڕۆ دووبارە سوودی لێ دەبینرێتەوە. بەشێوەیەک داڕێژراوە بۆ ماوەی 30 ساڵی داهاتوو خزمەتی دانیشتووانی شارەکە بکات.

لێدوانی فەرمی: زەردەشت عەبدولخاڵق سەرسام، بەڕێوەبەری ئاوەڕۆی هەولێر بە ئاڤا میدیای گوت، ئەم پڕۆژەیە لەلایەن کۆمپانیای ئاوزان جێبەجێ دەکرێت. ئاوەڕۆی هەولێر لە هەریەکە لە دەرچەکانی شەقامی 120 مەتری گەڕەکی 32ـی پارک، نەخۆشخانەی ڕۆژئاوا، توڕەق، سەرکارێز، دەرچەی عەنکاوە، لەگەڵ ئاوەڕۆی کۆرنیشی هەولێر ئەمانە هەموویان یەک دەخرێن و نزیکەی 25 کیلۆمەتر تۆڕی ئاوەڕۆ دادەنرێت، دواتر دەبرێن بەرەو یەک وێستگەیەک، لەوێ بە ستانداردێکی جیهانی دەپاڵێورێت.

زەردەشت عەبدولخاڵق سەرسام دەشڵێت: پڕۆژەکە 16 لاینە 52،500 مەتر سێجا لەلایەن یابانییەکان جێبەجێ دەکرێت. لەم پڕۆژەیە ئاوەڕۆی هەولێر بە ڕێڕەوێکی کۆنکریتی ژێرخاک دەنرێت. واتا چیتر ئاوەڕۆ بۆ کاری کشتوکاڵ بەکارناهێنرێت، بەڵکو ئەو ئاوەڕۆیەی پاک دەکرێتەوە ئینجا و بۆ کشتوکاڵ و شوشتنگەی ئۆتۆمبێل و پڕۆژەی پشتێنەی سەوزایی بەکاردێت.

ژمارەکان وا دەڵێن: قۆناغی دووەمی پڕۆژەی وێستگەی پاککردنەوەی ئاوی ئاوەڕۆی هەولێر لەسەر ڕووبەری 205 دۆنم زەوی لە ڕۆژئاوای هەولێر جێبەجێ دەکرێت. توانای پاککردنەوەی 840 هەزار مەتر سێجا ئاوی قورسی (ئاوی ڕەش و خۆڵەمێشی) لە ڕۆژێکدا دەبێت. قۆناغی دووەم کە ئەمڕۆ بەردی بناغەی دادەنرێت توانای پاڵاوتنی 210 هەزار مەتر سێجا ئاوەڕۆی دەبێ.

زانیاریی زیاتر: پڕۆژەکە لە چەند پێکهاتەیەکی سەرەکی پێکدێت، یەکەمیان تۆڕی گواستنەوەی ئاوەڕۆیە بەدرێژایی 21.9 کیلۆمەتر کە 5.3 کیلۆمەتری بە تەکنیکی پێشکەوتووی (Pipe Jacking) جێبەجێ دەکرێت ئەمە کاریگەری دەبێ لەسەر ئەوەی پێویست بە هەڵکۆڵینی شەقامەکان نەکات. پێکهاتەی دووەم، پێکدێت لە وێستگەیەکی مۆدێرنی چارەسەرکردن (WWTP) کە پرۆسەی پاککردنەوەکە لە چەند قۆناغێکی وەک (سکرینکردن، هەواگۆڕکێ و پاڵاوتن) ئەنجام دەدات. 

 
ئەوەی پێویستە بیزانیت: دوای تەواو بوونی پڕۆژەکە قۆناغێکی دیکەی پڕۆژەکە دەستپێدەکات ئەویش دانانی چەپەر یان مەنهۆڵە لەبەردەرگای هەر ماڵێک بۆ ئەوەی ئاوی ئاوەڕۆی چێشتخانە و حەمام و توالێت بچێتەوە ناوی دواتر بەم تۆڕە دەبەسترێتەوە.