دووەمین فێستیڤاڵی تەحین و بەرهەمی خۆماڵی لە ئامێدی بەڕێوەدەچێت

ئاڤا نیوز 

 

ئامێدی ئامادەسازی بۆ بەڕێوەچوونی یەكێک لە فێستیڤاڵەکانی پەیوەست بە بەرهەم نێوخۆییەکان دەکات، 60 خێوەت بۆ نیشاندانی بەرهەمی تەحینی ناوچەکە و بەرهەمەکانی دیکە ئامادەکراون، کە بەرهەمەکانی ئەو قەزایە سنوورەکانی هەرێمی کوردستانی تێپەڕاندووە و ساڵانە دەیان تۆن تەحینی ئامێدی هەناردەی وڵاتانی دەرەوە دەکرێت.

 

وێنە گەورەکە: خاک و سروشتی دەڤەری ئامێدی گونجاوە بۆ کشتوکاڵکردن، بەناوبانگترین بەرهەمی ناوچەکەش تەحینە ئێستا 34 ئاشی ئاو و کارەبا لە سنووری قەزاکە هەن، کە تەحینی خۆماڵی بەرهەم دەهێنن.

 

ئەوەی پێوستە بیزانیت: ئەمساڵ 800 دۆنم بۆ چاندنی کونجی لە سنووری ئامێدی تەرخانکراوە، زیاتر لە 240 تۆن کونجی بەرهەم هاتووە کە ئەو بڕەش بەشی ئاشەوانەکان ناکات و ناچار بڕێکی دیکە لە ناوچەکانی دیکەی هەرێمی کوردستان دابین دەکرێت.

 

زانیاریی بەدەستهاتوو: ناوبانگی تەحینی ئامێدی سنوورەکانی هەرێمی کوردستانی تێپەڕاندووە لە عێراق و وڵاتانی دیکەیش خواستی زۆری لەسەرە، تەنیا لە ساڵی 2023ـدا 600 تۆن تەحین ڕەوانەی بازاڕەکانی دەرەوە کراون، بڕیارە ئەمساڵیش 65 تۆن بۆ هۆڵەندا و 25 تۆنیش بۆ ئەمریکا هەناردە بکرێت.

 

زانیاریی زیاتر: ئەم فێستیڤاڵە بۆ ماوەی دوو ڕۆژ بەردەوام دەبێت، جگە لە تەحین شوێن بۆ نیشاندان و فرۆشتنی دەیان بەرهەمی دیکەی خۆماڵی دەڤەرەکە ئامادەکراوە لەوانە، ڕووبە هەنار، برنجی کوردی،کەلوپەلی خواردنی وشککراو و بەرهەمی شیرەمەنی.