بەڵینی سەرۆک بارزانی بۆ گەنجانی دووزخورماتوو: بەردەوام لە پشتانم

ئاڤا نیوز

دوای ئەوەی سەرۆک بارزانی پێشوازی لە ژمارەیەک گەنجی دووزخورماتوو کرد، یەكێک لە گەنجەکان لەبارەی دیدارەکەوە بە ئاڤای ڕاگەیاند: سەرۆک بارزانی پێ گوتین بەردەوام لە پشتانم، جارێکی دیکە ڕێگە نادەین بابەتێکی لەمشێوەیە ڕووبداتەوە. 

چیرۆکی سەرەکی: ڕۆژی 11-11-2025 لە کاتی بەڕێوەچوونی هەڵبژاردنی ئەنجوومەنی نوێنەرانی عێراق، چەند گەنجێکی کورد ئاڵای کوردستانیان بەرز کردەوە، دواتر یەکێک لەو گەنجانە لەلایەن سەربازێکی سوپای عێراق بە چەک هێرشی کرایە سەر و ئازار درا. دوای ئەوەی ئەم ڕووداوە لە تۆڕە کۆمەڵایەتییەکان کاردانەوەی زۆری دروست کرد، سوپای عێراق ڕایگەیاند ئەو سەربازەیان دەستگیرکردووە کە هێرشی کردە سەر گەنجە کوردەکە.

لێدوانی فەرمی: کوردۆ عەدنان، یەكێک لەو گەنجانەی لەلایەن سەرۆک بارزانییەوە پێشوازی لێکرا بە ئاڤای ڕاگەیاند: سەرۆک بارزانی، پشتیووانی لێکردین و زۆر سوپاسیشی کردین بۆ ئەو هەڵوێستەمان، هاوکات پێشی گوتین جارێکی دیکە ڕێگە نادەین بابەتێکی لەمشێوەیە ڕووبداتەوە. 

لە بەشێکی دیکەی قسەکانیدا  کوردۆ عەدنان گوتی: سەرۆک بارزانی باسی لە قارەمانییەتی خەڵک و گەنجانی دووزخورماتوو کرد کە لە ڕووبەڕووبوونەوەی چەندین شەڕدا ڕۆڵێکی گەورە و کاریگەرییان هەبووە لە پێناو پاراستی کوردستان. 

- ئەو گەنجەی دووزخورماتوو باسی لەوەشكرد: هەستمان کرد سەرۆکێکی زۆر گەورە لە کوردستان هەیە کە پاڵپشتیمان دەکات و پشتمان بەو قایمە، دەستبەردارمان نابێت تا ئەو ڕۆژەی دەمرین، هەر وەکو خۆی دەڵێت: "ئێمە دوای ڕیفراندۆم سەرمان بۆ ئاڵای کوردستان دادەنێین"، ئێمەش لەو فێربووین ئاڵاکەمان نەدەینە دەست هیچ نەتەوەیەکی دیکە.

باکگراوند: ڕۆژانی بانگەشە و ڕۆژی هەڵبژاردنی ئەنجوومەنی نوێنەرانی عێراق، چەندین ڕووداوی پەیوەست بە هەڵکردنی ئاڵای کوردستان لە پردی و دووزخورماتوو تۆمار کران، بەشێکیان لەلایەن سوپای عێراق و بەشێکی دیکەیان لەلایەن حزبێکی تورکمانی ئەنجام دران.