خامنەیی له‌باره‌ى هه‌ڵگیرسانى جه‌نگه‌وه‌ هۆشداریی دەداتە ئەمریکا

ئاڤا نیوز

ئایەتوڵڵا عەلی خامنەیی، ڕێبەری باڵای ئێران، هۆشداریی دایە ئەمریکا کە هەر هێرشێکی سەربازیی بۆ سەر وڵاتەکەی، جەنگێکی گەورەی ناوچەیی لێ دەکەوێتەوە و تەنها لە سنوورەکانی ئێراندا نامێنێتەوە.

لێدوانی فەرمی: ئایەتوڵڵا عەلی خامنەیی، ڕێبەری باڵای ئێران ڕایگەیاند: هەر هێرشێکی سەربازیی بۆ سەر ئێران، هەموو ناوچەکە دەگرێتەوە؛ ئێمە نابینە دەستپێشخەری جەنگ، بەڵام هەر لایەنێک هێرش بکات، ڕووبەڕووی گورزێکی کوشندە و بێ وێنە دەبێتەوە.

زانیاریی زیاتر: خامنەیی لە پەیامەکەیدا ئاماژەی بەوە کرد کە گەلی ئێران لە هەڕەشەکانی ئەمریکا و دەستەواژەی "هەموو بژاردەکان لەسەر مێزن" ناترسێت و ئەم فشارانە کاریگەرییان لەسەر ورەی نەتەوەکەیان نابێت.

ئەوەی لەبارەیەوە دەگوترێت: بە بڕوای شارەزایان، ئەم گوتارە ڕاستەوخۆ ئاماژەیە بۆ ئەوەی کە تاران ئامادەکاریی کردووە تاوەکو لە کاتی هێرشی ئەمریکادا، بەرژەوەندییەکانی ڕۆژئاوا لە تەواوی ڕۆژهەڵاتی ناوەڕاست بکاتە ئامانج. ئێران دەیەوێت لەرێگەی ئەم ستراتیژییەتەوە تێچووی هەر جووڵەیەکی سەربازیی بۆ ئیدارەی ترەمپ ئەوەندە گران بکات کە دیپلۆماسییەت وەک تاقە ڕێگە بمێنێتەوە، لەکاتێکدا جەخت دەکاتەوە کە وڵاتەکەی خوازیاری دەستپێکردنی هیچ شەڕێک نییە.