وەزیرێکی ئیسرائیل: ئاگربەست لەگەڵ عێراق و یەمەن ناکەین

ئاڤا نیوز

وەزیرێکی ئیسرائیلی لەبارەی ئەو جموجۆڵانەی لە عێراق و یەمەنەوە دژ بە ئیسرائیل هەبوونە هۆشداری دەدات و ئاماژە بۆ ئەوە دەکات ئاگربەست لەگەڵ عێراق و یەمەن ناکەن.

 

وێنە گەورەکە: دوای دوو مانگ لە شەڕی سەرتاسەری نێوان ئیسرائیل و حزبوڵڵای لوبنانی، ڕێککەوتنی ئاگربەست بە نێوەندگیری ئەمریکا و فەرەنسا بە مەبەستی کۆتاییهێنان بەو ململانێیە وێرانکەرە ڕاگەیێنرا.

 

لێدوانی ڕۆژنامەوانی: میدیای ئیسرائیل لەسەر زاری زیڤ ئێلکین، وەزیری ئیسرائیل ڕایگەیاند: جموجۆڵەکان لە عێراق و یەمەن یارمەتیدەر بوونە بۆ حەماس، بۆیە ئاگربەست لەگەڵ ئەوان ناکەین.

 

بە تەنیشت ئەو بابەتەوە: محەممەد شیاع سوودانی، سەرۆکوەزیرانی عێراق بە سەردانێک لە ئیسپانیایە بە مەبەستی بەدەستهێنانی پشتیووانی نێودەوڵەتی لە بەرامبەر هەڕەشەکانی ئیسرائیل بۆ سەر عێراق.

 

زانیاریی بەدەستهاتوو: بەگوێرەی سەرچاوەیەکی حکومی، سوودانی لە سەردانەکەیدا ئەم بابەتە لەگەڵ یەکێتی ئەوروپا تاوتوێ دەکات بۆ دڵنیابوون لە کۆبوونەوەیەکی نێودەوڵەتی کە دڵنیایی بدات لەوەی هیچ هێرشێکی ئیسرائیل ئەنجام نەدرێت.

 

ئەوەی پێویستە بیزانیت: ئیسرائیل نامەیەکی بۆ ئەنجوومەنی ئاسایشی نێودەوڵەتی ناردووە و گرووپە چەکدارەکانی عێراق تۆمەتبار دەکات بەوەی هێرشی کوشندەیان دژی ئیسرائیل ئەنجامداوە، هاوکات بە مافی خۆشی دەزانێت وەڵامی ئەو هەڕەشانە بداتەوە کە لە خاکی عێراقەوە دەکرێتە سەریان.