ڕۆژنامەیەکی ئەمریکی: ئێران فرۆشی نەوتی زیادکردووە بەڵام پارەیەکی کەمی دەستدەکەوێت

ئاڤا نیوز

بەگوێرەی ڕاپۆرتێکی ڕۆژنامەی 'وۆڵ ستریت جۆرناڵ' بازرگانانی جیهان بەهۆی سزاکانی سەر ئێران قازانجیان کردووە و بە نرخێکی کەمتر لە بازاڕ نەوتی ئەو وڵاتەیان دەستدەکەوێت و بەراورد بە ساڵانی ڕابردوو ئێران لە ساڵی 2025 نەوتی زیاتری هەناردەکردووە و زیاتریش بە چین فرۆشتووە.

چیرۆکی سەرەکی: بەهۆی سزاکانی ئەمریکا و وڵاتانی ڕۆژئاوا، ئێران چەند ڕێگایەکی کەمی لەبەردەمە بۆ ساغکردنەوەی نەوتەکەی، یەکێک لەو ڕێگایەنەش کەشتییە سێبەرەکانن، کە تۆڕێکی جیهانین بۆ ساغکردنەوەی نەوت. کەمبوونەوەی داهاتی نەوت، قەیرانی ئابووریی لە ئێران زیاتر کردووە و بەهۆیەوە لەسەرانسەری ئەو وڵاتە خۆپیشاندان دەستیپێکرد و تا ئێستاش بەردەوامە.

زانیاریی زیاتر: بەگوێرەی ئەو داتایانەی ڕۆژنامە ئەمریکییەکە دەستی کەوتووە، ئێران 3٪ـی بەرهەمی نەوتی ڕۆژانەی جیهان دەردەهێنێت و ساڵی ڕابردوو فرۆشی نەوتەکەی گەیشتووەتە 30ملیار دۆلار. بەشێوەیەکی سەرەکی ئێران نەوتەکەی بە پاڵاوگە بچووکەکانی چین دەفرۆشێت و نەوتەکەی ئێرانیان بە نرخێکی کەمتر لە بازاری نەوتی جیهان دەستکەوێت.

لەلایەکی دیکەوە: کەمبوونەوەی داهاتی نەوت، زیانی بە ڕێژەی دراوی بیانیی لە ئێران گەیاندووە، کە وڵاتەکە بۆ دابینکردنی تێچووی هاوردەکردن و پاڵپشتیکردنی بەهای دراوەکەی پشتی پێدەبەستێت بەمەش ئەوەندەی دیکە قەیرانی ئابووری ئەو وڵاتەی قووڵکردووەتەوە.

ئەوەی پێویستە بیزانیت: هەڕەشەی لێدانی گورزی سەربازی ئەمریکا بۆ سەر ئێران، هێشتا ماوە و بەرپرسانی ئیدارەی ترەمپ جەختیان کردووەتەوە هەموو بژاردەکان لە سەر مێزی دۆناڵد ترەمپ سەرۆکی ئەمریکایە. ئەم مانگە، ئەمریکا، لە وەڵامی بەکارهێنانی توندوتیژی و کوشتنی خۆپیشاندەران، سزای نوێی بەسەر ژمارەیەک کەسایەتی و دامەزراوەی پەیوەندیدار بە کەرتی فرۆشتنی نەوتی لە بازاڕە جیهانییەکان سەپاند.