نەتەوەیەکگرتووەکان: ئەگەر فرۆکەخانەی سەنعا لە کار بکەوێت ناتوانین هاوکارییەکان بگەیێنینە یەمەن

ئاڤا نیوز

 

جولیان هارنیس، نوێنەری نەتەوەیەکگرتووەکان بۆ هاوکاری مرۆیی نیگەرانی خۆی لە هێرشەکانی ئیسرائیل بۆ سەر فڕۆکەخانەی نێودەوڵەتی سەنعا لە یەمەن دەردەبڕێت و دەڵێت بە لەکارکەوتنی ئەو فرۆکەخانەیە گەیاندنی هاوکارییەکان بۆ ئەو وڵاتە ڕادەگیرێن.

 

چیرۆکی سەرەکی: هارنیس لە کاتی بۆردوومانەکەی ئیسرائیل لە فڕۆکەخانەی سەنعا لە یەمەن لەگەڵ تێدرۆس ئەدهانۆم، بەڕێوەبەری گشتیی ڕێکخراوی تەندروستیی جیهانی و 18 ئەندامی دیکەی نەتەوەیەکگرتووەکان لە فرۆکەخانەکە بوون، دوای بۆردوومانکردنیشی دەستبەجێ لە شوێنەکە هەڵاتوون، هاوکات تەنیا یەکێک لە ئەندامانی ڕێکخراوەکە برینداربوو.

 

لێدوانی فەرمی: هارنیس ڕایگەیاند، "فڕۆکەخانەی سەنعا دامەزاروەیەکی گرنگە بۆ گواستنەوەی هاوکاری مرۆیی بۆ هاووڵاتییانی وڵاتێک کە بەهۆی شەڕەوە لە نێو یەکێک لە خراپترین قەیرانە مرۆییەکانی جیهان دەژین". بەگوتەی هارنیش، ئەگەر ئەو فڕۆکەخانەیە لە کاربکەوێت، گەیاندنی هاوکارییە مرۆییەکانیش دەوەستێت.

 

ئەوەی پێویستە بیزانیت: ئیسرائیل لە دوای غەززە و بەیرووت، ئەمجارە ئاراستەی هێرشەکانی بۆ یەمەن گۆڕیوە و شەڕی لەگەڵ حووسییەکان چرکردووەتەوە. ئیسرائیل وەک وەڵامێک بۆ هێرشی حووسییەکان چەند ڕۆژێک لەمەوبەر هێرشی کردە سەر یەمەن، وێستەگەیەکی کارەبا و  فڕۆکەخانەی سەنعا بۆردوومان کرد.