دەم پارتی بۆ ئاڤا: لە دوو ڕۆژی داهاتوودا سەردانی سەڵاحەددین دەمیرتاش دەکەین

ئاڤا نیوز

 

دوای سەردانەکەیان بۆ ئیمرالی و کۆبوونەوەیان لەگەڵ ئۆجەلان، شاندێکی دەم پارتی سەردانی سەڵاحەددین دەمیرتاش، سەرۆکی پێشووی هەدەپە دەکەن لە زیندان.

 

وێنە گەورەکە: هەوڵەکان بۆ سەرپێخستنی پرۆسەی ئاشتی لە تورکیا چڕترکراونەتەوە، دەم پارتی گەڕێکی دانووستانی لەگەڵ سەرجەم لایەنە سیاسییەکان دەستپێکرد، پێشتریش چوونە ئیمرالی لەگەڵ ئۆجەلان کۆبوونەوە و بڕیارە سەردانی سەڵاحەددین دەمیرتاشیش بکەن.

 

لێدوانی فەرمی: محەممەد کەماچ، پەرلەمانتاری دەم پارتی بە ئاڤا میدیای ڕاگەیاند، دوای کۆتاییهاتنی گەڕی دانووستانەکان لەگەڵ سەرجەم پارتە سیاسییەکان، لە دوو ڕۆژی داهاتوودا واتە چوارشەممە و پێنج شەممە سەردانی سەڵاحەددین دەمیرتاش، سەرۆکی پێشووی هەدەپە دەکەیەن.

محەممەد کەماچ گووتیشی، لەم هەفتەیە سەردانەکانمان بۆلای سەرجەم پارت و لایەنە سیاسییەکان تەواودەبێت، بەڵام سەردانی ئیی پارتی ناکەین، ئەوان هەر لەسەرەتاوە پێشوازیکردنیان لە شاندەکەی ئێمە ڕەتکردەوە.

 

لەلایەکی دیکەوە: دەم پارتی سەردانی جەهەپەی کرد و لەگەڵ ئۆزگور ئۆزێل، سەرۆکی پارتەکە کۆبوونەوە، هاوشێوەی هەموو کۆبوونەوەکانی دیکە هیچ زانیارییەک و وردەکارییەک دەربارەی ناوەرۆکی کۆبوونەوەکە ئاشکرانەکرا، بڕیاریش وایە سەردانی پارتی رەفایی نوێ بکەن. 

 

زانیاریی بەدەستهاتوو: دوای تەواوبوونی کۆبوونەوەی شاندەکە لەگەڵ سەرجەم پارت و لایەنە سیاسییەکان و دەمیرتاش، جارێکی دیکە شاندەکەی دەم پارتی دەچنەوە ئیمرالی و لەگەڵ ئۆجەلان کۆدەبنەوە.