کەشتییەکی نەوتهەڵگر لە گەرووی هورمز لەلایەن ئێرانەوە دەستی بەسەردا گیرا

ئاڤا نیوز

ئێران دەستی بەسەر کەشتییەکی نەوتهەڵگر گرتووە و گواستوویەتییەوە بۆ ئاوە هەرێمییەکانی وڵاتەکەی، ئەوەش لە کاتێکدایە کە گرژییەکان لە ناوچەکەدا لە زیادبووندان.

وێنە گەورەکە: گەرووی هورمز یەکێکە لە گەرووە دەریاییە ستراتیژییە گرنگەکانی جیهان و نزیکەی 20%ـی نەوتی جیهان بەو گەرووە تێپەڕدەبێت.

لێدوانی فەرمی: بەرپرسێکی ئەمریکی کە نەیویستووە ناوەکەی ئاشکرابکرێت ڕایگەیاندووە، کەشتییەکە ناوی تالارا بووە و لە وڵاتی ئیماراتەوە نەوتی بۆ وڵاتی سەنگافوورە گواستووەتەوە، بەڵام لە گەرووی هورمز لەلایەن هێزی دەریای ئێران ڕێگری لێکراوە و دەستی بەسەردا گیراوە.

لەلایەکی دیکەوە: فەرماندەی ناوەندی هێزی دەریایی ئەمریکا ڕایگەیاند، ئاگاداری ڕووداوەکەین و چاودێری دۆخەکە دەکەین. کەشتییە بازرگانییەکان مافی ئەوەیان هەیە بە بێ بەربەست لە دەریادا هاتووچۆ و بازرگانی بکەن.

زانیاریی بەدەستهاتوو: بەپێی زانیارییەکان، فڕۆکەیەکی بێفڕۆکەوانی جۆری MQ-4C Triton ـی هێزی دەریایی ئەمریکا بۆ ماوەی چەند کاتژمێرێک بەسەر ئەو ناوچەیەدا سووڕاوەتەوە و چاودێری ڕووداوەکەی کردووە.

ئەمەش بزانە: ئێران پێشتر چەند جارێک هەڕەشەی داخستنی گەرووی هورمزی کردووە و هێزی دەریایی ئەمریکاش لە کەنداو بە وردی چاودێری گەرووەکە دەکەن بۆ ئەوەی دڵنیاببنەوە لەوەی لەلایەن ئێرانەوە داناخرێت.