جێگری والیی ویلایەتی كەركووكی داعش کوژرا

ئاڤا نیوز

 

لە بۆردومانێكی فڕۆكە جەنگییەكانی عێراق، جێگری والیی ویلایەتی کەرکووکی داعش و شەش چەكداری دیكەی پاشماوەكانی ئەو ڕێكخراوە دەكوژرێن.

 

وێنە گەورەكە: هێزی ئاسمانیی عێراقی ئۆپەراسیۆنێكی ئاسمانی لەدژی پاشماوەكانی داعش لە دەورووبەری چیای حەمرین لە پارێزگاكانی كەركووك و دیالە ئەنجامدا و سەرچاوە ئەمنییەكان باس لە كوژرانی 7 تیرۆرستی داعش دەكەن كە یەكێك لە كوژراوەكان جێگری والیی بەناوی ویلایەتی كەركووكە.

 

ڕاگەیێنراوی فەرمی: سەرچاوەیەكی ئەمنی لە فەرماندەیی ئۆپەراسیۆنەكانی كەركووك بە میدیا عێراقییەكانی ڕاگەیاندووە، ئێوارەی ئەمڕۆ ئۆپەراسیۆنێكی ئاسمانی بۆ لەناوبردنی شانە نووستووەكانی داعش و مۆڵگەی تیرۆرستان لە دەورووبەری چیای حەمرین ئەنجامدراوە.

 

ئەو سەرچاوە ئەمنیە ڕوونیشی كردۆتەوە، لەنێو تەرمی كوژراوەكاندا، كەسێك دۆزراوەتەوە كە بە (ئەبو عوبەیدە) ناونرابوو، جێگری والیی بەناو ویلایەتی كەركووكی ڕێكخراوی داعش بووە. هاوكات دوای خاپووركردنی مۆڵگەیەكی تیرۆرستان، چەكی جۆری ئێم-16 و دووربینی حەراری و دوو بۆمبی دەستی و پشتێنی تەقەمەنی دۆزراونەتەوە لەگەڵ چەندین كەلوپەلی دیكەی لۆجستی بۆ ئەنجامدانی كردەی تیرۆرستی.