پاشماوەی خۆراک دەکرێت بە سووتەمەنیی فڕۆکە

ئاڤا نیوز

لە داهێنانێکی نوێدا زانایانی ئەمەریکی پاشماوەی خۆراک دەکەن بە سووتەمەنیی فڕۆکە و لەم ڕێیەوە هەم ڕێگە لە بەفیڕۆدانی بەرهەمە خۆراکییەکان دەگیرێت، هەم وزەیەکی نوێبۆوە بەرهەم دەهێنرێت کە نابێتە هۆی پیسبوونی ژینگە.

چیرۆکی سەرەکی: زانایانی زانکۆی ئیلینۆی لە ئێربانا – شەمپەین لە داهێنانێکی نوێدا توانیوویانە بە ڕێگایەکی کیمیایی پاشماوە خۆراکییەکان بکەن بە سووتەمەنیی فڕۆکە.

بۆچی گرنگە: گرنگی ئەم داهێنانە لەوەدایە ئەم سووتەمەنییە نوێیە جێی سووتەمەنیی بەبەردبوو دەگرێتەوە. سووتەمەنیی بەبەردبوو دەبێتە هۆی دەردانی کاربۆن و تێکەڵبوونی لەگەڵ هەوا و پیسکردنی.

زانیاریی زیاتر: زانایان بەم ڕێگەیە کە ناویان لێناوە "هایدرۆسێرماڵی شلەوەکراو" پاشماوەی خۆراکی دەگۆڕن بۆ " نەوتی خاوی زیندەیی" و لە تاقیگە لاسایی پرۆسەی دروستبوونی سووتەمەنیی بەبەردبوو لەناو سروشتدا دەکرێتەوە.

لەژێر گەرمی و گوشاری زۆردا پاشماوە خۆراکییەکان دەکرێن بە شلە و ماددەیەکی وەک نەوتی خاویان لێ بەرهەم دەهێنرێت.

ئەو زیندەبارستەیەی بەرهەم دەهێنرێت، دواتر لە هایدرۆجین و کادەڵیست دادەماڵرێت. پاشان بە جیاکردنەوەی توخمەکانی وەک ئۆکسجین، نایترۆجین و گۆگرد؛ دەکرێت بەو سووتەمەنییەی لەلایەن بزوێنەری فڕۆکەوە بەکار دەهێنرێت.

ئەم داهێنانە لە تەواوی تێستەکانی کۆمەڵەی پشکنینی کەرەستەکانی ئەمەریکا و دەزگای فڕۆکەوانیی فیدراڵی دەرچووە.

بەم جۆرەیش بەبێ تیکەڵکردنی هیچ جۆرە سووتەمەنییەکی بەبەردبوو، ڕاستەوخۆ دەتوانرێت ئەم سووتەمەنییە بۆ بزوێنەی فڕۆکە بەکار بهێنرێت.

ئەمەش بزانە: دەبێتە هۆی ئەوەی لە 30% بەرهەمە خۆراکییەکان بەفیڕۆ نەچن و لە زبڵخانەکاندا شی نەبنەوە و نەبنە هۆی دەردانی گازە گەرمکەرەکان.