شەپۆلی بارانبارین کۆتایی دێت و تەم ڕوو لە ناوچەکانی کوردستان دەکات

ئاڤا نیوز
 
بەڕێوەبەرایەتیی گشتیی کەشناسی و بوومەلەرزەزانی بڵاویکردەوە، ئەو شەپۆلە بارانەی ئێستا ڕووی لە ناوچەکانی هەرێمی کوردستان کردووە، وردە وردە نامێنێت و سبەی دووشەممە تەواو دەبێت. 

چیرۆکی سەرەکی: ماوەی دوو ڕۆژە شەپۆلێکی بارانبارین ڕووی لە هەرێمی کوردستان کردووە و ئاسمانی بەشێک لە ناوچەکانیش تاوەکو ئێستا هەور و پەڵە هەورە، چاوەڕوان دەکرێت کاریگەری باران بارین لەماوەی چەند کاتژمێری داهاتوودا کۆتایی بێت. 

بڵاوکراوەی فەرمی: بەڕێوەبەرایەتیی گشتیی کەشناسی و بوومەلەرزەزانی ڕایگەیاند: لە دوانێوەڕۆ ئەمڕۆوە شەپۆلی بارانبارین لە پارێزگاکانی هەولێر و کەرکووک و ئیدارەی گەرمیان کەمدەبێتەوە و لەناوچە شاخاوییەکانیش تەم دروست دەبێت. 

زانیاریی زیاتر: خێرایی با و پلەی گەرمیش بە گوێرەی ناوچەکان دەگۆڕێت بەمشێوەی خوارەوە:-

٠ خێرایی با مامناوەند دەبێت، لەنێوان 10 بۆ 15  کیلۆمەتر.

٠ ئاراستەی با لە باکووری خۆرهەڵات دێت.

٠ مەوداى بینین 6 بۆ 8  کیلۆمەتر دەبێت لە ناوچە شاخاوییەکانیش کەم دەبێتەوە بۆ  2 بۆ 4 کیلۆمەتر.

بەرزترین پلەکانی گەرمای پێشبینیکراو بە پلەی سیلیزی بەم شێوەیە دەبێت:

هەولێر: 21 پلەی سیلیزی
سلێمانی: 17 پلەی سیلیزی
دهۆک: 17 پلەی سیلیزی
زاخۆ: 17  پلەی سیلیزی
کەرکوک: 20 پلەی سیلیزی 
هەڵەبجە: 19 پلەی سیلیزی
سۆران: 18پلەی سیلیزی
حاجی ئۆمەران: 9 پلەی سیلیزی
گەرمیان: 22 پلەی سیلیزی

لێدوانی فەرمی: شێخ دارا، شارەزای کەشوهەوا و پێشکەشکاری ئاڤا ڕاگەیاند: لە ڕۆژی دووشممە، 17-11-2025  شەپۆلی بارانبارینەکە دوور دەکەوێتەوە و لە دوای نێوەرۆی ئەو ڕۆژە پلەکانی گەرما دوو پلە بۆ چوار پلە بەرزدەبنەوە و ماوەی بینین کەم دەبینەوە و داوا لە شۆفێران دەکەم  پابەندی ڕێنماییەکانی هاتووچۆبن.