مەسرور بارزانی جەخت لە گرنگیی پەرەپێدانیی وەبەرهێنانی کۆمپانیا ئەمەریکییەکان لە هەرێمی کوردستان دەکاتەوە

ئاڤا نیوز

ئەنجوومەنی بازرگانيی ئەمەریکا، پیرۆزبایی سەرکەوتن و ئەنجامی هەڵبژاردنی پەرلەمانی عێراقی لە سەرۆکوەزیران مەسرور بارزانی دەکات، ئەمەش دوای ئەوەی شاندێکی ئەنجوومەنەکە سەردانی سەرۆکی حکومەتی هەرێمییان کرد.

وێنە گەورەکە: ئەمڕۆ یەکشەممە، 16-11-2025، مەسرور بارزانی، سەرۆکی حکومەتی هەرێمی کوردستان، پێشوازی لە شاندێکی ئەنجومەنی بازرگانيی ئەمەریکا ـــ کوردستان USKBC کرد.

ڕاگەیێنراوی فەرمی: ماڵپەڕی حکومەتی هەرێمی کوردستان بڵاوی کردەوە، لە سەرەتای کۆبوونەوەکەدا، دەیڤد تەفوری، سەرۆکی ئەنجومەنەکە پیرۆزبایی سەرکەوتن و ئەنجامی هەڵبژاردنی ئەنجومەنی نوێنەرانی عێراقی لە سەرۆکی حکومەت کرد و کورتەیەکیشی لەبارەی ئامانجی سەردانەکەیان و پێکهاتەی شاندەکە بۆ هەرێمی کوردستان خستەڕوو.

زانیاریی زیاتر: هەر بەپێی بڵاوکراوەکەی حکومەتی هەرێم، لە کۆبوونەوەکەدا سەرۆکی حکومەت تیشکی خستەسەر دوایین پێشهات و گۆڕانکارییەکانی هەرێمی کوردستان و عێراق بە گشتی. باسیشی لە چاکسازییەکانی کابینەی نۆیەمی حکومەتی هەرێمی کوردستان، لە کەرتە جۆراجۆرەکان، بەتایبەتی وزە و گازی سروشتی کردووە. جەختیشیی لە گرنگیی پەرەپێدانیی وەبەرهێنانی کۆمپانیا ئەمەریکییەکان لە هەرێمی کوردستان کردەوە.

باکگراوند: لە 22ـی ئایاری 2025، مەسرور بارزانی، سەرۆكی حكومەتی هەرێمی كوردستان،  لە واشنتن بەشداریی گفتوگۆیەكی تایبەتی كۆڕبەندی وزەی کرد بە ناونیشانی "داهاتووی وزە لە هەرێمی کوردستان"، كە تێیدا ڕوانین و دیدگای هەرێمی كوردستان بۆ پەرەپێدانی كەرتی وزەی خستەڕوو، هەر لەسەردانەکەیدا زیاتر لە 20 کۆبوونەوەی لەگەڵ وەزیر و کۆنگرێسمانانی ئەمریکا کرد، ئەمە جگە لە دوو گرێبەستی گەورەی 110 ملیار دۆلاری بۆ بواری وزە.  ئیدارەی ترەمپیش پشتگیری و پشتیوانیی خۆی بۆ هەرێمی کوردستان لە کەرتی وزە و کارەبا و چاکسازییەکانی حکومەت دووپات کردەوە.