چوارچێوەی هەماهەنگی پێکهێنانی گەورەترین فراکسیۆنی پەرلەمانی ڕاگەیاند

ئاڤا نیوز

 

چەند کاتژمێرێک دوای ڕاگەیاندنی ئەنجامی کۆتایی هەڵبژاردنە پەرلەمانییەکەی عێراق، سەرکردەکانی چوارچێوەی هەماهەنگی کۆبوونەوە و گەورەترین فراکسیۆنی پەرلەمانییان لە خولی نوێی پەرلەماندا ڕاگەیاند کە خاوەنی زیاتر لە 150 کورسیین، دوو لیژنەشیان بۆ دیاریکردنی سەرۆکوەزیران و کارنامەی حکومەت پێکهێنا.

وێنە گەورەکە: ئەمشەو ئاڤا میدیا وەک یەکەم میدیای هەرێمی کوردستان لە زاری عامر فایز، سەرۆکی هاوپەیمانی تەسمیم و یەکێک لە بەشداربووانی کۆبوونەوەکە بڵاویکردەوە، چوارچێوەی هەماهەنگی شیعەکان بە ئامادەبوونی سەرۆکوەزیرانی عێراق و سەرجەم سەرکردەکانی کۆبووەتەوە و ڕێکارەکانی دەستنیشانکردنی کاندیدی سەرۆکوەزیران دەستپێکردووە.

ڕاگەیێنراوی فەرمی: چوارچێوەی هەماهەنگی ئەمشەو لە ماڵی حەیدەر عەبادی، سەرۆکوەزیرانی پێشووتری عێراق بە ئامادەبوونی سەرجەم سەرکردەکانیی و لەناویاندا محەممەد شیاع سوودانی، سەرۆکی هاوپەیمانی ئاوەدانکردنەوە و گەشەپێدان کۆبووەوە، لە ڕاگەیێنراوێکی کۆتایی کۆبوونەوەکەشدا ئاماژەی بەوەداوە، بۆ سەرکەوتنی پرۆسەی هەڵبژاردن پیرۆزبایی لە گەلی عێراق دەکات.

ئەوەشی خستووەتەڕوو، گرنگە بەرکەوتەکانی هەڵبژاردن بەگوێرەی ماوەی دەستووری یەکلاییبکرێنەوە، لەو چوارچێوەیەشدا لایەنەکانی ناو ئەم هاوپەیمانێتییە واژۆیان لەسەر پێکهێنانی گەورەترین فراکسیۆنی پەرلەمانی کرد کە مافی دیاریکردنی سەرۆکوەزیرانی هەیە.

لەبارەی کاندیدی سەرۆکوەزیرانی عێراقیش، چوارچێوەی هەماهەنگی دەڵێت، بڕیاردراوە دوو لیژنەی باڵا لە ئاستی سەرکردایەتی پێکبهێنرێن لیژنەی یەکەم بەرکەوتەکانی هەڵبژاردن و کارنامەی داهاتوو بۆ بەڕێوەبردنی دەوڵەت یەکلایی دەکاتەوە، لیژنەی دووەمیش چاوپێککەوتن لەگەڵ کاندیدەکان بۆ پۆستی سەرۆکوەزیران دەکات ئەویش لەسەر بنەمای پیشەیی و نیشتیمانیی.

لەو کۆبوونەوەیەدا سەرکردەکانی  چوارچێوەی هەماهەنگی باسیان لە پێوەرەکانی دیاریکرنی سەرۆکوەزیران و کارنامەی حکومەتی داهاتووش کردووە، بەجۆرێک لەگەڵ ئاستەنگییە سیاسیی، ئابووری و خزمەتگوزارییەکان بگونجێت و لەئاست خواستی هاووڵاتیاندا بێت.