ئەو چەک و کەرەستانەی لە تاوان بەکاردەهێنرێن چییان لێ دەکرێت؟

ئاڤا نیوز

ماوەی پێنج ساڵ دەبێت، سەدان پارچە چەک و کەرەستەی جۆراوجۆری تاوان لە کۆگاکانی بنکە و نوسینگەکانی پۆلیس لە هەرێمی کوردستان ماونەتەوە. 

گرفتەكە چییە: ئاڤا بۆی دەركەوتووە، کەڵەکەبوونی ئەو ژمارە زۆرەی چەک و کەرەستەی تاوان پەیوەندی هەیە بە ڕێکاری ئیدارییەوە. بە دیاریکراوی پەیوەندی هەیە بە نەناردنی بڕیاری دادگا کە بڕگەیەکی پەیوەستە بە چارەنووسی ئەو چەك و كەرەستانەی كە تاوانیان پێ ئەنجامدراوە یاخود بۆ ئەنجامدانی تاوان بەكارهاتوون.

ئەوەی پێویستە بیزانیت: کاتێک بڕیاری دادگا لەسەر دۆسیەیەکی تاوان دەردەچێت دەبێت، نوسراوێکی فەرمی لە دادگاوە بێت بۆ ئەو بنکەی پۆلیسەی دەستیگرتووە بەسەر چەکەکە یان کەرەستەکان، بۆئەوەی چارەنووسی یەکلایی بکرێتەوە.

زانیاریی زیاتر: ئەوەی تێبینی كراوە پرۆسەی دادگاییكردن لە هەموو دادگاكانی تاوان و كەتن بە خاوی بەڕێوەدەچێت و دۆسیەكان زۆر دوادەخرێن.

نووسراوی فەرمی: ئاڤا میدیا نوسراوێکی لایە و زانیاری هەیە، داوا لە ئەنجوومەنی دادوەریی هەرێمی كوردستان كراوە، دادگاكان پابەندبكات بە خێرا یەكلایی كردنەوەی داواكان لەلایەك و ساغكردنەوەی كەلوپەلی تاوان لەلایەكی دیكەوە.

 

چارەنووسی ئەو کەرەستانە چی لێدێت؟

هەر كەرەستەیەكی تاوانكاری بەگوێرەی ترسناكییەكەی لەلایەن دەزگا پەیوەندیدارەكانی حكومەتەوە لەناودەبردرێن یاخوود بۆ مەبەستی مرۆیی و پێویست بەكاردەهێنرێن، ئەگەر بەهای ماددیشی هەبێت ئەوا داهاتەكەی بۆ خەزێنەی گشتیی حکومەت دەگەڕێتەوە. بەنموونە؛ ماددە هۆشبەرەكان بەشی زۆری لەلایەن دەزگاكانی ئاسایشەوە لەناودەبردرێن و بەشێكیشی ڕادەستی وەزارەتی تەندروستی دەكرێت بۆ ئەوەی بۆ چارەسەریی پزیشكی بەكاربهێندرێت.