شاندی ئیمرالی سەردانی سەڵاحەددین دەمیرتاش دەکات

ئاڤا نیوز

 

ئەمڕۆ شاندی ئیمرالی کە لە ئەحمەد تورک، سری سورەیا ئۆندار و پەروین بوڵدان پێکهاتووە سەردانی سەڵاحەددین دەمیرتاش، سەرۆکی پێشووی هەدەپە دەکەن لە ئەدێرنا، ڕای دەمیرتاش لەسەر پێشنیارەکەی دەوڵەت باخچەلی، سەرۆکی مەهەپە لەسەر "پرسی ئازادکردنی عەبدوڵڵا ئۆجەلان، ڕێبەری پارتی کرێکارانی کوردستان" وەردەگرن.

 

وێنە گەورەکە: ماوەی دوو هەفتەیە شاندی ئیمرالی دوای ئەوەی چاوپێکەوتنیان لەگەڵ ئۆجەلان کرد، دەستیان کردووە بە سەردانیکردنی لایەنە سیاسییەکانی تورکیا، ئەم سەردانەی دەمیرتاش هەر لەو چوارچێوەیەدا.

 

بۆچی گرنگە: دەمیرتاش کەسایەتییەکی گرنگە و ڕاو بۆچوونی ئەوە لەسەر پرۆسەکە کاریگەریی دەبێت، بەجۆرێک بەشێک لە کوردانی باکووری کوردستان ئازادکردنی ئۆجەلان بەبێ ئازادکردنی دەمیرتاش "بەبێ مانابوونی پرۆسەی ئاشتەوایی" ناودەبەن.

 

هەنگاوی داهاتوو: چاوەڕوان دەکرێت دوای سەردانەکەی دەمیرتاش، شاندەکە سبەی سەردانی فیگان یوکسێکداغ، هاوسەرۆکی پێشووی هەدەپە بکەن، سەرجەم کۆبوونەوەکان داخراو دەبن و هیچ ڕاگەیێنراوێک لەسەر سەردانەکە بڵاوناکرێتەوە.